«Իրատեսի» զրուցակիցն է ՀՅԴ Էկոնոմիկայի և ֆինանսների հանձնախմբի նախագահ, տնտեսագետ ԱՐՄԵՆ ԳՐԻԳՈՐՅԱՆԸ։
-Եթե Երևանի կենտրոնի բնակիչներն անշարժ գույք են ժառանգություն ստացել, բայց սոցիալապես ապահով չեն, թոշակառու կամ ոչ մեծ եկամուտներ ունեցող մարդիկ են, ապա ի՞նչ հիմքով պետք է բարձրանա նրանց գույքահարկը։
-Դա իսկապես կարևոր հարց է։ Բազմաթիվ են այն մարդիկ, որ ապրում են իրենց նախնիներից ժառանգած բնակարաններում։ Մարդիկ ծնվել են այդ տներում, մեծացել են, դա իրենց կյանքի մի մասն է, ի վերջո օջախ է՝ ավանդույթներով և հիշողություններով։ Հետևաբար անընդունելի է «Իմ քայլը» խմբակցության պատգամավորներից մեկի տեսակետը, թե բարձր հարկ վճարելուց խուսափելու համար կենտրոնում գտնվող տունդ վաճառիր, տեղափոխվիր քաղաքի ծայրամաս: Խնդիրն իսկապես նուրբ է։ Իմ նպատակը բնավ հարուստներին պաշտպանելը չէ, հարուստը, միևնույն է, իր հարկը կվճարի: Մտահոգությունս այն շարքային քաղաքացիների, հիմնականում միայնակ թոշակառուների մասին է, որ տուժելու են օրենքից։
-Համավարակի, տնտեսության անկման պայմաններում նման որոշման ընդունումն արդյո՞ք բխում էր մեր երկրի տնտեսական և սոցիալական շահերից:
Կարդացեք նաև
-Տնտեսության ու որոշ ոլորտների դեպքում անդառնալիորեն անկման պայմաններում, այս օրենքը պետության ու քաղաքացիների շահերից չի բխում: Ստացվում է՝ երկրում համավարակի ու արտակարգ դրության պայմաններում կառավարությունը և Ազգային ժողովում իր կցորդ իշխանական խմբակցությունն առանց հանրային պատշաճ լսումների, քաղաքացիների ձայնն ու առաջարկները լսելու ամեն անգամ դժգոհությունների տեղիք տվող օրենքներ են ընդունում: Սա նշանակում է, որ իշխանություններն անում են այն, ինչ ուզում են, նրանք հաշվետու չեն հասարակությանը։ Մենք՝ դաշնակցականներս, արտակարգ դրության շրջանը գնահատել ենք անբավարար, կարանտինը՝ ձախողված, տնտեսությունը՝ գահավիժող։ Արտակարգ դրության իրավական ռեժիմը գործող կառավարությունն առավելապես օգտագործում է քաղաքական նպատակներով: Հետևաբար, այս ձախողված քաղաքականության ամբողջ պատասխանատվությունը կրում է անպատասխանատու և անկարող իշխանությունը:
Զրույցը՝ Սևակ ՎԱՐԴՈՒՄՅԱՆԻ
Հարցազրույցն ամբողջությամբ՝ «Իրատես» թերթի այսօրվա համարում
