«Այս պահին մեր կոչը մեկն է՝ պահպանել հակահամաճարակային կանոնները եւ սա կառավարության միակ պաշտոնական կոչն է։ Առողջապահության համակարգի մեր գործընկերներին մենք պետք է ճիշտ հասկանանք, որովհետեւ նրանք ամիսներ շարունակ աշխատում են գերմարդկային ծանրաբեռնվածությամբ»,-այսօր պարետատան նիստից հետո ճեպազրույցում ասաց վարչապետ Նիկոլ Փաշինյանը՝ պատասխանելով հարցին՝ արդյոք առողջապահության նախարարի կոչն ու կառավարության՝ ռեստորան-սրճարանների աշխատելու թույլտվությունը չեն հակասում իրար:
Երեկ առողջապահության նախարար Արսեն Թորոսյանը ֆեյսբուքի իր էջում գրառում էր կատարել, որով քաղաքացիներին հորդորել էր սահմանափակել ոչ կենսական շփումները, այցերը, միջոցառումները.«Դադարեցրեք սրճարան-ռեստորանային այցելությունները, դա միակ տեղն է, որտեղ հնարավոր է լինել առանց դիմակի և վարակել միմյանց։ Եթե սնունդ եք ուզում ընդունել հենց այդ ռեստորանից, պատվիրեք այն եւ միայնակ սնվեք»:
Այս հայտարարությունից հետո ռեստորանների հայկական միությունը հայտարարություն էր տարածել, նշելով՝ առողջապահության նախարարի մակարդակով նման կատեգորիկ հայտարարությունը լրջորեն մտահոգում է ոլորտի ներկայացուցիչներին:
Նիկոլ Փաշինյանը շարունակելով պատասխանել հարցին, ասաց՝ համաճարակային իրավիճակի համար շատ են մեղադրում առողջապահական համակարգին.«Բայց ես ուզում եմ, որ այսօր համաճարակի տարածման դեմ պայքարում առողջապահության նախարարությունը չէ, որ պայքարում է կամ պետք է պայքարի: Առողջապահության նախարարությունը, առողջապահական համակարգը պայքարում է համաճարակի տարածման հետեւանքների դեմ, երբ հիվանդներ են հայտնվում,որոնք բուժօգնության կարիք ունեն: Եվ որքան շատ են հիվանդներն, այնքան ավելի ծանրանում է առողջապահական համակարգի գործը, մանավանդ, որ հիվանդանոցային տեղերը մի քանի անգամ ավելի շատ ծավալվել են»:
Կարդացեք նաև
Վարչապետը կրկնեց՝ կառավարության կոչն է պահպանել հակահամաճարակային կանոնները եւ չանել այնպիսի գործողություններ, որոնք հակասում են այդ կանոններին. «Հակահամաճարակային կանոնները ռեստորաններում ե՛ւ հնարավոր է պահպանել, ե՛ հնարավոր է չպահպանել։ Առօրյա կյանքում՝ նույնպես: Հարեւանի հետ կարելի է խոսել դիմակով մեկուկես մետր հեռավորությունից, եւ կարելի է խոսել առանց դիմակի ու 20սմ հեռավորության վրա:
Մեր կոչն է հակահամաճարակային կանոնները պահպանելն է՝ կրել դիմակ, պահպանել սոցիալական հեռավորություն եւ պարբերաբար ախտահանել ձեռքերը։ Դիմակը կարելի է հանել միայն սնվելիս»։
Նելլի ԲԱԲԱՅԱՆ
