«Մեզ անհրաժեշտ է գիտակցված լոքդաուն՝ պարտադրվածի փոխարեն». երեկ առողջապահության նախարար Արսեն Թորոսյանն այսպես դիմում էր քաղաքացիներին՝ կոչ անելով տանից դուրս գալ միայն խիստ անհրաժեշտության դեպքում, ձեռնպահ մնալ սրճարաններ, ռեստորաններ գնալուց: Մինչդեռ համացանցում այս կոչին զուգահեռ տարածվում էին պատգամավորների նկարներ՝ փողոցում, սրճարանում, այդ թվում՝ դիմակները կիսով չափ հանած:
Այսօր այս առնչությամբ «Իմ քայլը» խմբակցության պատգամավոր Տիգրան Ուլիխանյանը լրագրողների հետ զրույցում ասաց. «Ես մեր սիրելի հայրենակիցներին հորդորում եմ պահպանել պարետատան կողմից սահմանված 3 պարզագույն կանոնները՝ ժամանակ առ ժամանակ ախտահանել ձեռքերը, կրել դիմակներ ու պահպանել սոցիալական հեռավորություն՝ անկախ այն հանգամանքից, թե ով ինչպես է պահպանում կանոնները: Ես գիտեմ, որ իմ բոլոր գործընկերները պահպանում են կանոնները, մեկը՝ մի քիչ լավ, մեկը՝ մի քիչ վատ: Եթե հրապարակվել են լուսանկարներ, որ մեկը ինչ-որ մի պահի հանել է դիմակը, շատ վատ են արել, որ հանել են, բայց ես էլ եմ հանում, ժողովուրդ ջան, ժամանակ առ ժամանակ ես էլ հանում եմ՝ մի հատ մաքուր օդ շնչելու: Ես էլ եմ շատ վատ անում, չպետք է օրինակ վերցնել վատ արարքից, պետք է օրինակ վերցնել լավ արարքից ու որեւէ մեկը թող իր գործողությունները չկապի ուրիշների հետ: Այո, մենք խնդիր ունենք օրինակ` ծառայելու, բայց մենք հո չե՞նք ասում ամեն ինչով նմանվեք մեզ: Մեր դրական գործողությունները ընդօրինակելի են, բացասական գործողությունները…Հայաստանում այդպիսի մարդ չկա, որ բացասական բան չանի, պե՞տք է բացասականն ընդօրինակել: Շատ վատ են արել, ով որ նկարվել է այդպես: Ես էլ չեմ դիմանում, ես էլ եմ մեկ-մեկ դիմակս հանում այնտեղ, որտեղ չպետք է հանեմ, օրինակ, մեր այգում, լինում են այդպիսի բաներ: Հո դա հանրությունից չե՞մ թաքցնում, բայց նաեւ չեմ էլ քարոզում այդպիսի վարքագիծ»:
Դիտարկմանը, որ ձեզ չեն տուգանում, իսկ մյուս քաղաքացիներին, հենց դիմակը հանում են՝ տուգանում են՝ Ուլիխանյանը պատասխանեց. «Ես ուզում եմ ասել, որ սխալվել կարող են բոլորը ու այդ սխալը չպետք է դառնա վարքագծի կանոն, խրախուսելի կանոն, որ եթե ԱԺ պատգամավորը հանում է, ուրեմն մյուսն էլ պետք է հանի»:
Հռիփսիմե ՋԵԲԵՋՅԱՆ
