Վերջերս ՀՀ վարչապետը հայտարարեց, որ քաղցկեղ ունեցող բուժառուները այլեւս ստիպված չեն լինի արտասահման մեկնել, եղան նաեւ այլ հայտարարություններ: Aravot.am-ը ՀՀ առողջապահության նախարարությունից հետաքրքրվեց, ըստ մի շարք հաղորդագրությունների, Երեւանի ֆիզիկայի ինստիտուտի տարածքում գտնվող ցիկլոտրոնը սկսել է բժշկական հիմնարկներին մատակարարել իզոտոպ, ինչն անհրաժեշտ է քաղցկեղը վաղ շրջանում ախտանշելու համար՝ ՊԷՏ (պոզիտրոն էմիսիոն տոմոգրաֆիա) մեթոդով:
Քանի որ հարցը մարդկանց առողջությանն էր վերաբերվում, խնդրել էինք, պարզաբանել, թե ինչ ստուգումներ պետք է անցնի իզոտոպը, որպեսզի ստանա թույլտվություն՝ հիվանդին ներարկելու համար եւ մասնավորապես որտեղ և ինչպես է ստացվել այդ թույլտվությունը՝ իզոտոպը որպես բուժառուին ներարկվող պրեպարատ օգտագործվելու համար:
Առողջապահության նախարարի մամուլի խոսնակ Ալինա Նիկողոսյանն Aravot.am-ի հարցին ի պատասխան ասաց, որ նախարարությունը ստուգումներ անելու եւ վերահսկելու գործառույթ չունի, հարցն էլ իրենց դաշտում չէ, դրա համար կան այլ ստուգող մարմիններ: Նախարարի մամուլի խոսնակը նաեւ ասաց, որ հարցը վերահասցեագրել են Ռադիոիզոտոպների արտադրության կենտրոն ՓԲԸ-ին:
Ռադիոիզոտոպների արտադրության կենտրոն ՓԲԸ-ից էլ Aravot.am-ին կենտրոնի տնօրենի ժամանակավոր պաշտոնակատար Հովհաննես Զոհրաբյանից գրավոր ստացանք պատասխան, ըստ որի Ցիկլոն 18/18 արագացուցիչը, որի օգնությամբ արտադրվում է ֆտոր-18 ռադիոիզոտոպը, որն այնուհետեւ վերածվում է ռադիոֆարմպրեպարատի, գտնվում է Հալաբյան 38/7 Ռադիոիզոտոպների արտադրության կենտրոն ՓԲԸ-ում:
Կարդացեք նաև
Ռադիոիզոտոպների արտադրության կենտրոնի ժամանակավոր պաշտոնակատարը նշել էր, որ պրեպարատն անհնար է մատակարարել այլ բժշկական հիմնարկների, քանի որ օգտագործվում է միայն ՊԷՏ/ՀՏ ( պոզիտրոն էմիսիոն տոմոգրաֆիա/ համակարգչային տոմոգրաֆիա) հետազոտության նպատակով, իսկ ՀՀ-ում առկա միակ ՊԷՏ/ՀՏ -ն տեղադրված է իրենց կենտրոնում:
Հովհաննես Զոհրաբյանի պարզաբանմամբ. «Եվրասիական տնտեսական միության «Բժշկական կիրառության դեղերի գրանցման եւ փորձաքննության կանոնների մասին» որոշման համաձայն՝ բժշկական հաստատություններում ներքին սպառման համար արտադրվող ռադիոֆարմպրեպարատները ենթակա չեն գրանցման:
Պրեպարատի արտադրությունը, ինչպես նաեւ որակի հսկման ողջ գործընթացն իրականացվում է Եվրոպական դեղագրքի պահանջների (European Pharmacopoeia) համաձայն՝ պատշաճ արտադրական գործունեության ընթացակարգերով կենտրոնի որակի հսկման լաբորատորիայում՝ գերմանական (Elysia-raytest GmbH) ընկերության կողմից համապատասխան որակավորում ստացած կենտրոնի մասնագետների կողմից: Որակի հսկման լաբորատորիայի դրական եզրակացությունը հաստատում է պրեպարատի որակի համապատասխանությունը Եվրոպական դեղագրքի համապատասխան հոդվածում տեղ գտած չափանիշներին, ինչը հաստատված է գործողությունների ստանդարտ ընթացակարգեր (SOP) փաստաթղթերով, որից հետո միայն այն կիրառվում է ախտորոշման նպատակով:
Հավելենք, որ կենտրոնի որակի հսկման լաբորատորիայում շահագործվող հիմնական սարքավորումների հավաքակազմը, որի տեղադրման, շահագործման եւ կատարողական որակավորումներն իրականացվել են բելգիական կազմակերպության մասնագետների կողմից՝ միակն է ոչ միայն ՀՀ-ում, այլեւ ամբողջ տարածաշրջանում ու կիրառվում է նմանատիպ արտադրություններ ունեցող կենտրոններում»:
Գոհար ՀԱԿՈԲՅԱՆ
