Ինչպես տեղեկացրել էինք, Ռուբեն Հակոբյանին կանչել էին ԱԱԾ:
Քիչ առաջ նա դուրս եկավ ԱԱԾ շենքից ու լրագրողների հետ զրույցում հայտնեց, որ ԱԱԾ-ում տեխնիկական հարցեր են բավականին երկար քննարկել. «Ես առաջարկեցի, որ զրույցը բջջային հեռախոսով ձայնագրվի: Իրենք երեւի ղեկավարության հետ մի քանի անգամ քննարկեցին, վկայակոչեցին 2019-ի ապրիլի ինչ-որ մի օրենք, որտեղ նշված էր, թե ով կարող է ձայնագրել, բայց դա վերաբերում էր դատավարական պրոցեսին: Համենայնդեպս, համոզիչ չէր: Մենք հետաձգեցինք, հաջորդ անգամ ես փաստաբանի հետ կմիանամ, երեւի դա կլինի չորեքշաբթի, ժամը 3-ին: Նորմալ մոտեցում էր»:
Թե ինչու է Հակոբյանը պահանջել, որ խոսակցությունն ԱԱԾ-ում ձայնագրվի, այսպես բացատրեց. «Այս հիմնարկի հետ մի քանի անգամ կապ ունեցել եմ եւ հավատում եմ գնդապետերին, իրենց, բայց ժամանակը ցույց է տալիս, որ երբեմն կարող են խեղաթյուրված ներկայացնել զրույցը: Մի պարզ օրինակ բերեմ՝ համազգային մի դասալիք կա, որը վերջերս հանդիպել էր Նաիրի Հունանյանի հետ, դուրս է եկել ու ըստ իր շահերի ոնց ուզում, այնպես ներկայացնում է: Օրենքի բաց կա: Եթե ինքը հանդիպել է եւ ներկայացնում է բաներ, որոնց մենք տեղյակ չենք, կոնկրետ մարդկանց մեղադրում է ինչ-որ բաների մեջ, պետք է քաղաքացին կարողանա ծանոթանալ այդ ամբողջ ձայնագրությանը, որ իմանա՝ ինչի մասին է խոսքը: Սա օրենքի բաց է, մյուս կողմից՝ բարոյականության հարց, որը դասալիքը կարողանում է ներկայացնել՝ իր շահերից ելնելով, կամ իր պապաների հորդորներից»:
Ինչ վերաբերում է ԱԱԾ-ում այսօրվա հանդիպմանը, նա ասաց. «Ինչպես դասականը կասեր՝ օրենքի տառին համապատասխան, շատ նորմալ զրույց ենք ունեցել: Խոսել ենք օրենքի իրականացման, կիրառման մասին»:
Կարդացեք նաև
Հռիփսիմե ՋԵԲԵՋՅԱՆ
