«Վերնատուն» ակումբի անդամ, քաղաքական վերլուծությունների «Ակունք» կենտրոնի տնօրեն Ռուբեն Հակոբյանն այս պահին ԱԱԾ-ում է: Նրան կանչել են հարցաքննության:
Մինչ հարցաքննությունը Ռուբեն Հակոբյանը լրագրողների հետ զրույցում ասաց, որ երեկ ՍԴ-ի առջեւ փոքր ճեպազրույցում քննադատել է իշխանություններին, ասել է, որ Նիկոլ Փաշինյանը հակաօրինական, հակասահմանադրական միջոցներ է կիրառում, քաղաքական ընդդիմությանը պարտադրում է գործել օրենքի դաշտում, բայց ինքը հակաօրինական քայլերով անում է այն, ինչ ուզում է, թե՛ դատական, թե՛ օրենսդիր, թե՛ գործադիր մարմինները կենտրոնացրել է իր ձեռքում: Ուստի Հակոբյանն առաջարկել էր Փաշինյանի դեմ պայքարել իր մեթոդներով, ինչպես նա էր ռադիոտուն մտնում, հենց այդ մեթոդներն էլ պետք է կիրառել. «Ինքը կարողացավ իշխանության գալ պետական հեղաշրջման միջոցով, պետք է դիմել այդ գործիքակազմին: Ինքը գրավեց ռադիոտունը, ազգային անվտանգության, ռազմավարական նշանակության պետական պահպանության տակ գտնվող օբյեկտները»:
Ռուբեն Հակոբյանն այսօր իրեն ԱԱԾ հրավիրելը կապում է հենց իր այդ քննադատության հետ: Նրա խոսքով՝ ընդդիմության պահվածքը համարժեք չէ. «Ամեն օր, ով արթնանում է, ասում է՝ հակաօրինական, հակասահմանադրական ուղղություն է որդեգրել իշխանությունը, Նիկոլ Փաշինյանը: Լավ, հասկացանք, ինքը թքած ունի ե՛ւ սահմանադրության վրա, ե՛ւ օրենքների վրա: Ինքը, իր ընտանեկան կապալը, որը դիտում է հանրապետությունը որպես իրենց համքարություն, անում են այն, ինչ ուզում են: Պետական կառույցներ այսօր որպես այդպիսին գոյություն չունեն: Ասում ենք՝ բավական է այլեւս, երբ տեսնում ենք, որ ուշադրություն չի դարձվում, պետք է համարժեք քայլեր ձեռնարկել: Համարժեք քայլերն էլ՝ ինքը կարողացավ փողոցները փակելով, ռադիոտան նման պետական պահպանության օբյեկտը գրավելով, դռները ջարդելով՝ արեց այն, ինչ պետք է չարվեր: Եթե սելեկտիվ մոտեցում ունի ե՛ւ այսօրվա իշխանությունը, ե՛ւ ԱԱԾ-ն, այդպես էլ քրեաիրավական գնահատական չտրվեց ռադիոտան գրավմանը, այսօր ՀՀ-ում ցանկացած քաղաքացի կարող է դիմել նույն քայլին, ինչին դիմեց Նիկոլ Փաշինյանը»:
Հարցին՝ ձեզ ասե՞լ են, թե ինչու են կանչել ԱԱԾ, Ռուբեն Հակոբյանը պատասխանեց. «Մոտավորապես ասեցին, որ սահմանադրական կարգի հետ կապված կոչեր եմ արել»:
Կարդացեք նաև
Հռիփսիմե ՋԵԲԵՋՅԱՆ
