Հայաստանում դեռեւս կա այսպիսի ընկալում՝ համաճարակի դեմ պետք է պայքարի առողջապահական համակարգը, բայց սա թյուրըմբռնում է: Այսօր պարետատան նիստից հետո ճեպազրույցում ասաց վարչապետ Նիկոլ Փաշինյանը: Վարչապետի խոսքերով՝ առողջապահական համակարգը պայքարում է հետեւանքների դեմ, հիվանդների բուժմամբ, իսկ իրական պայքարը բակերում է, փողոցներում, հասարակական տրանսպորտում գրասենյակներում եւ այլուր: Եվ կորոնավիրուսի դեմ այս պայքարը, ըստ վարչապետի, պետք է տեղի ունենա առողջապահական համակարգից դուրս, ՀՀ քաղաքացիների մեծ մասը իր փոքրիկ լուման պետք է ներդնի այս պայքարում:
«Այսօր պետական կառավարման համակարգում 18 հազար է, որից ոստիկանությունը… թիվը գաղտնիք է, չեմ ասի, բայց ոստիկանությունը չի կարող 3 միլիոն մարդու վերահսկել, մենք չունենք 3 միլիոն ոստիկան, եւ նույնիսկ 300 հազար ոստիկան չունենք, ոստիկանության ուժերը սահմանափակ են»,-ասաց վարչապետը: Նա համեմատություն արեց 2018 թվականի իրադարձությունների հետ, նշելով՝ երբ ՀՀ քաղաքացիների 90%-ը անում է մի գործողություն՝ ոստիկանությունն անզոր է.«Հիմա բացասական իմաստով այդ ոգով չենք պահպանում հակահամաճարակային կանոնները: Հայաստանի հանրապետությունում չկան ռեպրեսիվ մեթոդներ եւ ցանկություն էլ չկա կիրառելու: Միակ ձեւը մնում է հաղորդակցությունը, երկխոսությունը, վարչական մեթոդների խստացումը: Գնալու ենք այս ճանապարհով»:
Նելլի ԲԱԲԱՅԱՆ
Կարդացեք նաև
