«Սա ուղերձ է հասարակությանը եւ միջազգային հանրությանն առ այն, որ Հայաստանում ժողովրդավարությունը մահացած է, որ ՀՀ-ում կա դիկտատոր, որը կարեւորում է ոչ թե ընտրություններն ու ժողովրդի կամքը, այլ միայն իր կամքը»,-Aravot.am-ի հետ զրույցում ասաց ՀՀԿ մամուլի խոսնակ Էդուարդ Շարմազանովը՝ անդրադառնալով երեկ ԱԺ նիստում վարչապետի արտահայտած հետեւյալ համոզմունքին՝ «Հաջորդ խորհրդարանում տեղ են ունենալու միայն այն ուժերը, որոնք 2018թ.-ին պաշտպանել են ժողովրդական հեղափոխության արժեքները»:
Հիշեցնենք, որ 2014-ի ապրիլին էլ դեռեւս Ազգային ժողովի փոխնախագահ Էդուարդ Շարմազանովն էր հայտարարել. «Եթե որևէ մեկը գալիք տարիների ընթացքում հավակնում է նախագահի կամ վարչապետի պաշտոնին, ապա այդ ճանապարհն անցնում է Մելիք-Ադամյան փողոցով»:
Էդուարդ Շարմազանովն այժմ հարցադրում արեց. «Վարչապետն ի՞նչ է պատրաստվում անել այն 200 000 քաղաքացիների հետ, որոնք ձայն են տվել ՀՀԿ-ին, «Բարգավաճ Հայաստանին» եւ ՀՅԴ-ին: 60 000 ձայն մենք ենք ստացել, 40 000՝ ՀՅԴ-ն, 100 000՝ ԲՀԿ-ն: Այդ 200 000 քաղաքացուն նա ուղերձ է հղում Սիբիր քշելո՞ւ, թե՞ ձերբակալելու: Այդ 200 000 քաղաքացուն, որոնք ընտրել են այն ուժերին, որոնք այսօր համամիտ չեն Փաշինյանի քաղաքականության հետ, բոլշեւիկների նման անվանի ժողովրդի թշնամի ու վագոններով քշի Սիբի՞ր: Սա հակաժողովրդավարական, հակապետական հայտարարություն է եւ վերջ»:
Լուիզա ՍՈՒՔԻԱՍՅԱՆ
