Ինչպես Լեոնիդ Գայդայի շնորհիվ Նատալյա Սելեզնյովան հայտնի դարձավ
Ռեժիսոր Լեոնիդ Գայդայի՝ 1965 թվականին նկարահանած «Ի» գործողությունը եւ Շուրիկի այլ արկածները» ֆիլմը ժամանակին մեծ հաջողություններ է ունեցել։ Այն այսօր էլ սիրով են դիտում: Շատերը այդ ֆիլմից հիշում են նաեւ Նատալյա Սելեզնյովային, որին հայտնի դարձրեց հենց Լեւոնիդ Գայդայը: Դերասանուհին, որ այս տարվա հունիսի 19-ին դարձավ 75 տարեկան, արդեն սովորական է վերաբերվում այն հանգամանքին, որ իրեն որպես Գայդայի ֆիլմի հերոս Շուրիկի ընկերուհի Լիդա են հիշում:
kulturologia.ru-ն ներկայացնում է, թե ով է Նատալյա Սելեզնյովան: Պարզվում է՝ նա դերասանական կարիերան սկսել է վեց տարեկանից՝ աղջնակին տեսել են փողոցում եւ ծնողներին առաջարկել փորձնական նկարահանման: Կինոյում նրա հոգեւոր մայրն է համարվում Ագնիա Բարտոն, որի պնդմամբ էլ «Ալյոշա Պտիցինը կոփում է բնավորությունը» ֆիլմում գլխավոր դերը հանձնվել է Նատալյային:
Նատալյան ծնվել է Մոսկվայում: Հայրը լուսանկարիչ էր, մայրը` նկարչուհի: 1966 թվականին նա ավարտել է Բորիս Շչուկինի անվան թատերական ուսումնարանի` Բորիս Զախավայի դասընթացները եւ աշխատանքի անցել Մոսկվայի Երգիծանքի թատրոնում: Ի դեպ, դպրոցական տարիների փառքը ուրախություն չի բերել աղջնակին, նրան չեն ընդունել պիոներիայի եւ կոմերիտմիության շարքերը, զբաղվածության պատճառով աղջիկը վատ է սովորել դպրոցում:
Տասնչորս տարեկանում աղջկա հասակն արդեն 175 սանտիմետր էր, ինչի պատճառով նա տարբերվում էր իր հասակակիցներից եւ համադասարանցիներից: Նատալյան մոդելային արտաքին ուներ, ինչի համար պարսավանքի էր արժանանում: Բանը հասավ նրան, որ աղջիկը մորն ասաց՝ եթե մեկ սանտիմետրով էլ հասակն աճի, ինքնասպան կլինի: Մայրը գտավ այդ հարցի լուծումը՝ աղջկան տվեց բասկետբոլի, որտեղ բոլորը նրա նման բարձրահասակ էին:
Նատալյա Սելեզնյովան իր դերասանական կարիերան հաջող է համարում, քանի որ բախտ է ունեցել աշխատել հայտնի ռեժիսորներ Գլեբ Պանֆիլովի, Իլյա ֆրեզի եւ Լեոնիդ Գայդայի հետ: Թեեւ նրա խաղընկեր Շուրիկին մարմնավորող Ալեքսանդր Դեմյանենկոն Նատալյայից մի գլուխ բարձր էր, Գայդայը նկարահանման հրապարակում Նատալյային կանգնեցնում էր փոսիկի մեջ, կամ Ալեքսանդրի ոտքերի տակ փոքր աթոռ էր դնում, եթե կադրում նրանք պետք է կողք կողքի լինեին: Ի դեպ, զվարճալի դրվագ կա՝ «Ի» գործողությունը եւ Շուրիկի մյուս արկածները» ֆիլմի հետ կապված: Երբ Գայդայն ասում է, որ պետք է հանվի ֆիլմում ու հարցնում՝ կարծես կազմվածքդ այդքան էլ լավը չէ, աղջիկը զայրանում է, իսկույն հանում սարաֆանը: «Ոնց լավը չէ, հապա նայեք»,-ասում է նա դիտմամբ իրեն հրահրած ռեժիսորին: Այդպես էլ ստանում է Լիդայի հայտնի դերը:
Շնորհիվ մի շարք ֆիլմերի, այդ թվում՝ «Իվան Վասիլեւիչը փոխում է մասնագիտությունը», «Ի» գործողությունը եւ Շուրիկի մյուս արկածները» եւ այլն, դերասանուհին հայտնի դարձավ ողջ ԽՍՀՄ-ով մեկ, նաեւ սկսեց արտասահման մեկնել: Նկարահանումներից մեկի ժամանակ Նատալա Սելեզնյովան հանդիպեց Վլադիմիր Անդրեեւի հետ, նրանց միջեւ սիրավեպ ծնվեց, սակայն մեկ ամիս անց դերասանն ամուսնացավ այլ աղջկա հետ, ում հետ հանդիպում էր շուրջ յոթ տարի: Դերասանուհին ծանր տարավ այդ բաժանումը, նաեւ խղճի խայթ ունեցավ, որ հնարավոր է «գողանար» ուրիշի երջանկությունը: Իննսունականներին դերասանուհին ծանր վիրահատություն տարավ, ինչի պատճառով կորցրեց ձայնը; Նա արդեն հույսը կտրել էր, որ երբեւէ կկարողանա խաղալ կինոյում կամ թատրոնում, սակայն մեկ տարի անց ձայնը եւ խոսքը վերականգնվեցին, եւ նա կրկին սկսեց զբաղվել սիրած մասնագիտությամբ:
Ի դեպ, նա հեշտությամբ հաղթահարեց բոլոր դժվարությունները, քանի որ կողքին էր հավատարիմ ամուսինը՝ դերասան Վլադիմիր Անդրեեւը, որից որդի ունեցավ: Վերջին տարիներին Նատալյա Սելեզնյովան դարձյալ մի քանի ծանր վիրահատության ենթարկվեց, սակայն հարազատ մարդու կողքին կարողացավ վերագտնել իրեն: Եվ այժմ սիրելի դերասանուհու ցանկությունը հարազատներին առողջ տեսնելն է: Չնայած տարիքին՝ նա շարունակում է մնալ նույնքան գեղեցիկ ու հմայիչ: Շուրիկի Լիդան չի ծերանում:
Պատրաստեց
Գոհար ՀԱԿՈԲՅԱՆԸ
«Առավոտ» օրաթերթ
25.06.2020
