Առողջապահության համաշխարհային կազմակերպության Եվրոպայի տարածաշրջանային գրասենյակի ղեկավարի հատուկ խորհրդական և Լատվիայում ԱՀԿ ներկայացուցիչ Միշել Թիերենը, որը մեկ շաբաթ գտնվել էր Երևանում, լրագրողների հետ առցանց հանդիպման ընթացքում ասաց, որ Հայաստանի իրավիճակը եզակի է տարածաշրջանում, և դեռ կորոնավիրուսի կորը իր գագաթնակետին չի հասել։
Միշել Թիերենի խոսքերով պատվիրակության՝ Հայաստան գալու պատճառներից մեկն այն էր, որ երկրորդ արգելափակման կարիքը կարող է առաջանալ։
Նա ընդգծեց, որ այս պահին իրենք մշակում են միջոցառումների փաթեթ Հայաստանի համար․ «Մենք ունենք գիտելիքներ այլ երկրների փորձից և կարող ենք այսպիսի փաթեթը գործարկել։ Բայց դա չի նշանակում, որ կան նախապայմաններ, որոնց շուրջ չենք կարող բանակցել։ Այս փաթեթի բացարձակ կարևոր նախապայմաններն են թեստավորումը, վերահսկումը, մեկուսացումը, ֆիզիկական հեռավորությունը։ Հարկադրանքը և ենթարկումը մի փոքր դժվար են Հայաստանում։ Առաջարկներ են արվել հասարակությանը՝ կրել դիմակներ և կատարել նման միջոցառումներ»։
Միշել Թիերենը ասաց, որ պատվիրակությանը ընդունել են առողջապահության նախարար Արսեն Թորոսյանը և վարչապետ Նիկոլ Փաշինյանը․ «Մենք փոխանցել ենք ուղերձը և ասել ենք՝ տեսեք, մենք ինչ-որ մի բան ենք մշակել, որը բնակչությանը վնաս չի հասցնի։ Հայաստանի մասին կանխատեսումները կրիտիկական են, կորը բարձրանում է։ Երբ ես այցելում էի հիվանդանոցներ և լաբորատորիաներ, առողջապահական համակարգը գործում է իր կրիտիկական սահմաններում, բայց դրա միջով կանցնի գործընկերների ինտենսիվ օգնությամբ, և քանի որ կառավարությունը չափազանց մոբիլիզացված է»։
Կարդացեք նաև
Ամի ՉԻՉԱԿՅԱՆ
