«Համավարակի պայմաններում ավելանում է վարկառուների թիվը, եւ քանի որ բանկերը զգույշ են վարկեր տրամադրելու հարցում, քաղաքացիներն ավելի շատ դիմում են վարկային կազմակերպություններին: Այդ վարկերը երբեմն աննորմալ բարձր տոկոսներով են տրվում: Վարկային կազմակերպությունների հանդեպ ուշադրությունն ավելացրե՞լ եք»,-կենտրոնական բանկի տարեկան հաղորդման ներկայացման ժամանակ այսօր ԱԺ նիստում ԿԲ նախագահ Մարտին Գալստյանից հետաքրքրվեց անկուսակցական պատգամավոր Արման Բաբաջանյանը:
Մարտին Գալստյանը նախ հայտնեց, որ վերջին ամիսներին վարկային կազմակերպությունների վարկավորման միջին տոկոսադրույքը 5%-ով իջել է: «Ինչ վերաբերում է ծավալին, ապա գյուղական բնակավայրերում վարկավորման ծավալն ավելացել է, որովհետեւ կառավարությունն աջակցության ծրագրեր ունի, եւ այդ վարկավորումն իրականացվում է ոչ թե վարկային կազմակերպությունների, այլ բանկերի միջոցով»,-տեղեկացրեց ԿԲ նախագահը:
Նա ապա վստահեցրեց, որ ԿԲ-ն չափազանց խիստ է վարկային կազմակերպությունների հանդեպ:
«Տեսնում ենք շահարկումների անախորժ դեպքեր, որոնք փորձում են ստվեր գցել ողջ համակարգի վրա: Ես այդ վարքագիծը կրիմինալ կանվանեմ, որովհետեւ տասնյակ հազարավոր մարդկանց անուններ են շահարկում: Դա իրականության հետ աղերս չունի: Այդ խմբին քանիցս փորձել ենք բերել առարկայական բանավեճի դաշտ: Նախորդ շաբաթ նրանց ի վերջո հրավիրեցինք ԿԲ, եւ ԿԲ-ի չորս բարձրաստիճան պաշտոնյաներ հանդիպեցին նրանց»,-նշեց Մարտին Գալստյանը:
Կարդացեք նաև
Նրա խոսքով. «Հրավիրվածներին բացի թեժ գծից տրվել է անհատական հեռախոսահամար եւ էլեկտրոնային հասցե, եւ խնդրել ենք մեզ տրամադրել այս «տասնյակ հազարավոր» մարդկանցից ստացված դիմում բողոքները: Մեզ, սակայն, տրվել է զրո ինֆորմացիա»,-փաստեց Գալստյանը: Նրա խոսքով՝ նեղ անձնական կամ խմբային շահերից ելնելով հանրության վիճակը շահարկելը կրիմինալ գործելաոճ է:
Հիշեցնենք, որ ԿԲ-ի դիմաց վերջերս ցույցեր էր անում «Ոչ վարկային թալանին» նախաձեռնությունը:
Լուիզա ՍՈՒՔԻԱՍՅԱՆ
