«ՀՀ-ում սոցիալական ճգնաժամ չկա: Ավելին՝ 2019թ.-ին եղել են էական ձեռքբերումներ, որոնց պտուղները վայելում է ՀՀ քաղաքացին: Իհարկե, համավարակի ընթացքում առաջացել են դժվարություններ, որոնք հիմա հաղթահարվում են կառավարության թիրախային ծրագրերով: Էլ չասեմ թոշակների եւ աշխատավարձերի բարձրացման մասին, որոնք վերջնական հարց չեն լուծել, բայց կառավարությունը շարժվում է ճիշտ ուղղությամբ»,-ԱԺ նիստում այսօր 2019թ.-ի պետբյուջեի կատարման հաշվետվության քննարկման ժամանակ անդրադառնալով «Լուսավոր Հայաստան» խմբակցության ղեկավար Էդմոն Մարուքյանի հայտարարությանը, որ ՀՀ-ում քաղաքական, սոցիալական եւ տնտեսական ճգնաժամ է, ասաց խորհրդարանի նախագահ Արարատ Միրզոյանը:
Նրա խոսքով՝ այս ընթացքում էլի կլինեն չնախատեսված դժվարություններ, եւ գործադիրը կարձագանքի. «Իսկ տնտեսական ճգնաժամ եւս չկա: Հակառակը, 2019թ.-ին սկսված զարգացման պտուղները հիմա պետք է քաղեինք, եթե չլիներ կորոնավիրուսի համավարակը: Կառավարությանը, խոստովանենք, հիմա հաջողվում է տնտեսական իրավիճակը կայուն պայմաններում պահել»:
Ինչ վերաբերում է Մարուքյանի մատնանշած քաղաքական ճգնաժամին, Միրզոյանի խոսքով. «Այն եւս չկա, որքան էլ փորձեն դրա իմիտացիան անել ՀՀ նախագահի պաշտոնը նախկինում զբաղեցրած անձինք եւ նրանց հետ կապակցվածները, մեզանից շանս ստացածները, կասկածելի շարժառիթներ ունեցող ուժերը: Քաղաքական ճգնաժամ չկա, այլ բան կա՝ ՀՀ քաղաքական դաշտը հիշեցնում է շինհրապարակ, խառնարան, որտեղ պետք է նոր քաղաքական միտք ձեւավորվի, որը տեսլական է ներկայացնելու ՀՀ քաղաքացուն՝ քաղաքական ապագայի վերաբերյալ: Այս խառնարանում կորչելու են այն ուժերը, որոնց շարժառիթը փողն ու կոռուպցիան են»:
Կարդացեք նաև
Լուիզա ՍՈՒՔԻԱՍՅԱՆ
