«Քաղաքական մեծամասնությանը հետաքրքիր չէ՝ ԲՀԿ-ն բոյկոտո՞ւմ է, թե ոչ, որովհետեւ դա ընդդիմության իրավունքն է: ԲՀԿ-ն բոյկոտում է, որովհետեւ գուցե դժգոհ է իրավական գործընթացից, գուցե դրանով փորձում է «պատժել» քաղաքական մեծամասնությանը: Ձեր հարցը պետք է ուղղել այն ընդդիմությանը, որը բոյկոտել է»,-ԱԺ նիստում այսօր 2019թ.-ի պետբյուջեի կատարման քննարկման ժամանակ անդրադառնալով «Լուսավոր Հայաստան» խմբակցության ղեկավար Էդմոն Մարուքյանի ելույթին, որում նա իշխանությանը մեղադրեց ԲՀԿ-ի՝ ԱԺ նիստերի բոյկոտով չհետաքրքրվելու, երկիրը տնտեսական-քաղաքական ճգնաժամի հասցնելու եւ ընդդիմադիր թերթերին լռեցնելու համար՝ ասաց «Իմ քայլը» խմբակցության ղեկավար Լիլիթ Մակունցը:
«Եթե իրավական գործընթացին չխոչընդոտելը համարում եք լռեցնել, դուք ազնիվ չեք ՀՀ քաղաքացիների հետ: Ընդդիմությանը հաճելի է, թե ոչ, բայց մենք օրենքով ենք առաջնորդվում»,-նկատի ունենալով ԲՀԿ առաջնորդ Գագիկ Ծառուկյանի հանդեպ իրավական գործընթացը՝ Մարուքյանին ասաց Մակունցը:
«Կարդացեք մամուլը եւ տեսեք, թե քանի տոկոսն է քննադատում իշխանությանը՝ ոչ այնքան փաստերի, որքան հորինված թեզերի հիման վրա, նաեւ տեղափոխվելով անձնական դաշտ եւ խախտելով լրագրողական էթիկան: ՀՀ-ում չկա այլ ճգնաժամ, քան կորոնավիրուսով պայմանավորված իրավիճակը: Որեւէ այլ ճգնաժամ ՀՀ-ում չկա»,-հավելեց Լիլիթ Մակունցը:
Կարդացեք նաև
Լուիզա ՍՈՒՔԻԱՍՅԱՆ
