«Ափսոսանքով սկսեմ ելույթս, որովհետեւ ԲՀԿ-ն բացակայում է: Կատարողականը կարեւոր է նաեւ այն առումով, որ վերջին օրերի քննարկումները միտված էին կառավարության թվացյալ անհաջողություններին, եւ արդյունքում գալիս էին եզրահանգումների, թե կառավարության 97-100%-ը պետք է փոխվի»,-ԱԺ նիստում այսօր 2019թ.-ի պետբյուջեի կատարման հաշվետվության ներկայացման ժամանակ ասաց «Իմ քայլի» պատգամավոր, պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը: Հիշեցնենք, որ ԲՀԿ-ն բոյկոտել է նիստը:
Նկատի ունենալով ԲՀԿ առաջնորդ Գագիկ Ծառուկյանի այն հայտարարությունը, որ երեք ամիս անց ՀՀ-ում սով է լինելու, Անդրանիկ Քոչարյանը նշեց. «Մի քանի անգամ ֆինանսների նախարարի, Արտակ Մանուկյանի հետ քննարկում էի՝ ի վերջո, սով լինելու է, թե չէ…»:
Ինչ վերաբերում է անվտանգության ոլորտին, Քոչարյանի խոսքով՝ վերջին շրջանում հայտնվեցին բայղուշներ եւ սկսեցին անել բայղուշ հայտարարություններ. «Ի հայտ եկան փորձագետներ, որոնք իրենց ելույթներով վտանգեցին ՀՀ-ի անվտանգությունը. հասանք այն աստիճանի, որ հակառակորդներին հուշեցինք, որ կարող ենք հարձակումներ սկսել: Այսօրվա երկրի անվտանգությունն ապահովում է լեգիտիմ իշխանությունը»:
Անդրանիկ Քոչարյանի բնորոշմամբ՝ ՀՀ պաշտպանական գերատեսչության 2019թ.-ի պետբյուջեի կատարման զեկույցը փաստում է, որ ՊՆ-ն իր առջեւ դրած խնդիր լուծել է, ունենք ձեռքբերումներ, ինչը նկատեց անգամ հակառակորդի պաշտպանության նախարարը՝ ասելով, որ Ադրբեջանն առաջնագծում չի կարողանում պլանավորել գործողություններ, որովհետեւ իրավիճակը նախկինից տարբերվում է:
Կարդացեք նաև
Լուիզա ՍՈՒՔԻԱՍՅԱՆ
