«Այն, ինչ կատարվեց ԱԺ-ում երեկ, դա սահմանադրական կարգի տապալում էր, դա սահմանադրական հեղաշրջում էր, որն իրականացվեց գործող իշխանությունների կողմից»,- այսօր Factor.am-ի հետ զրույցում ասաց «Հայրենիք» կուսակցության նախագահ Արթուր Վանեցյանն` անդրադառնալով երեկ խորհրդարանում ընդունված «Սահմանադրական փոփոխությունների մասին» օրենքի նախագծին:
Հիշեցնենք, որ «Իմ քայլի» նոր օրինագծով՝ 12 տարի պաշտոնավարած ՍԴ դատավորները պետք է դադարեցնեն պաշտոնավարումը, իսկ օրինագծի ուժի մեջ մտնելու արդյունքում ՍԴ գործող նախագահ Հրայր Թովմասյանի լիազորությունները դադարեցվելու են:
Արթուր Վանեցյանի գնահատմամբ, դրա արդյունքում մեր պետության իրավական անվտանգությունը դրված է լուրջ վտանգի տակ եւ ինքը չգիտի, թե որոնք են լինելու հետագա անելիքները, որ այս դժվար իրավիճակից դուրս գանք. «Կարծում եմ, որ բոլոր կարող ուժերը պետք է համախմբվեն այդ հարցի շուրջ եւ պետությունը բերեն հետ՝ իրավական հարթություն, որովհետեւ այն, ինչ կատարվում է այսօր մեր երկրում, դա հստակ տանում է բռնապետության հաստատման եւ մեկ անձի կառավարման իշխանությանը»:
Լրագրողները հիշեցրին՝ մի առիթով Արթուր Վանեցյանն ասել էր, որ իր հրաժարականից հետո Հրայր Թովմասյանի շուրջ օղակը սեղմվեց, իսկ Հրայր Թովմասյանն էլ ասել էր, որ Արթուր Վանեցյանը շատ բան ունի ասելու եւ հետաքրքրվեցին՝ հիմա կարո՞ղ է հստակեցնել՝ ինչի՞ մասին է խոսքը, ի՞նչ հրահանգ էր իրեն տրվել եւ ինչո՞ւ այն չկատարեց: Արթուր Վանեցյանը պատասխանեց. «Ես բազմիցս նշել եմ, որ երբեք չեմ խոսելու իմ՝ ԱԱԾ տնօրեն եղած ժամանակահատվածում ստացված հանձնարարությունների, կատարման կամ չկատարման գործընթացի վերաբերյալ, որովհետեւ դա ուղղակի կոռեկտ չէ: Ես ասելու բան ցանկացած հարցի շուրջ կարող եմ ունենալ, բայց չեմ ցանկանում անդրադառնալ հստակ Հրայր Թովմասյանի ասածին: Կարող եմ միայն ասել մի բան՝ իմ պաշտոնավարման ընթացքում ԱԱԾ-ն քաղաքական պատվեր չի կատարել եւ այլախոհներ ման չի եկել այն մարդկանց շրջանում, որոնք ունեն իշխանությունից տարբերվող կարծիք»:
Կարդացեք նաև
Անդրադառնալով ռուսական КГБ-ի՝ Հայաստանի ԱԱԾ-ի վրա ազդեցությունների եւ իր՝ ռուսական համարանիշով մեքենա վարելուն, մեքենայի համարանիշն, ի դեպ, արդեն փոխված է, Արթուր Վանեցյանը կրկին բացառեց այդ ազդեցությունը եւ, առնվազն, ծիծաղելի ու որոշակի շրջանակների կողմից ուղղորդվող մանիպուլյացիա համարեց իր մեքենայի ռուսական համարանիշը կապելը մի ամբողջ պետական կառույցի վրա ազդեցության հետ: «ՀՀ ԱԱԾ-ի վրա երբեւիցե ռուսական կամ այլ երկրի ազդեցություն չի եղել: Մենք ունենք, այո, գործընկերային հարաբերություններ ՌԴ-ի, նաեւ այլ երկրների հատուկ ծառայությունների հետ, որոնք հստակ սահմանված են պայմանագրերով, եւ այդ պայմանագրերի շրջանակներում մեր աշխատանքներն իրականացվում են»,- կրկնեց Արթուր Վանեցյանը:
Լրագրողը հիշեցրեց հայտնի գաղտնալսման ձայնագրությունը, որտեղ, երբ խոսվում է Յուրի Խաչատուրովին կալանավորելու մասին, Արթուր Վանեցյանն ասում է՝ ռուսների հետ հարաբերությունները հազիվ են կարգավորվել, այդ կալանավորմամբ կրկին խնդիրներ կառաջանան եւ հետաքրքրվեց՝ արդյոք, դա չի՞ խոսում Հայաստանի վրա ռուսական ազդեցության մասին: Արթուր Վանեցյանը պարզաբանեց, որ խոսքը ԵԱՏՄ-ի շրջանակներում տնտեսական հարաբերությունների մասին է եւ շատ զարմանալի կլիներ, որ Հայաստանը ռուսական կողմի հետ նորմալ հարաբերություններ չունենար: «ՌԴ-ն մեր բնական դաշնակիցն է, ՌԴ-ի հետ հարաբերությունները ես շատ կարեւորում եմ, կարեւորում եմ նաեւ Հայաստանի լավ հարաբերությունները մյուս երկրների հետ: Իմ կարծիքով, Հայաստանը պետք է ունենա փայլուն հարաբերություններ Վրաստանի եւ Իրանի հետ, լավ հարաբերություններ ԵՄ երկրների, ԱՄՆ-ի, Չինաստանի, Հնդկաստանի հետ»:
«Իմ քայլի» պատգամավորները տարբեր առիթներով հայտարարել են, որ Արթուր Վանեցյանն ԱԱԾ-ում ձախողվել է, քանի որ գաղտնալսումից մեկ տարի անց ինքը չի կարողացել բացահայտել, թե ով էր գաղտնալսողը: Լրագրողի այս դիտարկմանն էլ Արթուր Վանեցյանը պատասխանեց. «Անգամ չգիտեմ՝ ո՞վ է նման գնահատականներ տվել: Անցյալ օրը ինձ փորձում էին բացատրել, թե ո՞վ է նման գնահատականներ տվողը, այդպես էլ չհասկացա: Փառք Աստծո, որ ՔԿ նախագահ Հայկ Գրիգորյանն ԱԺ-ում, լրագրողների հետ զրույցում ասաց, որ գաղտնալսման գործը վաղուց բացահայտված է: Պարզապես, ես չեմ այն մարդն այսօր, որը պետք է այդ մասին մանրամասներ հայտնի»:
Նելլի ԳՐԻԳՈՐՅԱՆ
