Մարմնամարզության Հայաստանի տղամարդկանց ազգային հավաքականի գլխավոր մարզիչ Հակոբ Սերոբյանը «Արմենպրես»-ում հրավիրված մամուլի ասուլիսում, խոսելով կորոնավիրուսի համավարակի ունեցած բացասական ազդեցության եւ իրենց հետագա անելիքների մասին, ասաց, որ իրենց գլխավոր խնդիրը, թերեւս, պաշտոնական առաջնությունների եւ միջազգային մրցումների անցկացման ժամանակացույցի հետ կապված անորոշությունն է: «Պետք է իմանանք, թե որը երբ է եւ որտեղ, որպեսզի կարողանանք նախապատրաստվել: Հակառակ դեպքում կարիք չկա, որ վարժությունները բարդացնենք, հետո պարզվի, որ այդ մրցումը չի կայանալու ու թողնենք, որ մարզիկները հանգստանան»,- հայտարարեց մարզիչը:
Հարցին, թե որքանո՞վ են կարողանում մարզումների ժամանակ պահպանել անվտանգության մասին պարետատան սահմանած պայմանները, Հակոբ Սերոբյանը պատասխանեց. «Ամեն ինչ աշխատում ենք հնարավորինս անել. ջերմաչափում ենք, գրանցամատյան լրացնում: Բայց ամեն ինչ պահպանելը դժվար է: Օրինակ` մի գործիքի վրա իրար հետեւից մի քանի մարզիկներ են պարապում: Տեսեք. գործիքի վրա մագնեզիում է քսած: Եթե ամեն մեկից հետո ախտահանենք, մարզիկները շատ լուրջ վնասվածքներ կստանան: Բայց, կրկնում եմ, առավելագույն չափով աշխատում ենք պահպանել անվտանգության կանոնները, նաեւ սոցիալական հեռավորությունը պահպանելով»:
Աշոտ ՀԱԿՈԲՅԱՆ
