Տեսանելի ապագայում գոյակցելու ենք կորոնավիրուսի համավարակի հետ: Այսօր «COVID-19․ համաշխարհային համագործակցության հաջողությունն ու ուղիները» թեմայով առցանց վեբինարի ժամանակ ասաց Լորդ Արա Դարզին: Նա Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրենն է ,նաեւ Հայաստանի գիտության եւ տեխնոլոգիաների հիմնադրամի (FAST) խորհրդակցական խորհրդի անդամ: Նրա համոզմամբ, նախ պետք է խուսափել ողբերգական երեւույթներից եւ COVID-19-ից մահացությունը հասցնել նվազագույնի: Պարոն Դարզին նաեւ ասաց, որ վարակման մակարդակը ցածր պահելու համար մեզ պետք է մտածելակերպի փոփոխություն:
Արա Դարզիի համոզմամբ, միայն լայնածավալ թեստավորում եւ հետեւելիություն իրականացնելու արդյունքում է հնարավոր վարակը կառավարելի դարձնել: Նրա խոսքով` ի սկզբանե վարակն էր մեզ հետապնդում, հիմա մենք պետք է վարակին հետապնդենք եւ, եթե սկզբում հիվանդները ծանր վիճակում դիմում էին հիվանդանոցներ, հիմա պետք է հակառակը լինի՝ վարակին պետք է հետապնդել համայնքում եւ մարդիկ ծանր վիճակում չհայտնվեն հիվանդանոցներում: Արա Դարզին նաեւ ասաց, որ պետք է ազգային մակարդակով ունենալ համաճարաբանական հետազոտություններ եւ պետք է ունենալ վարակի մեկից ցածր վերարտադրություն:
Ըստ նրա, Միացյալ թագավորությունը չի կարող իրեն թույլ տալ եւս մեկ մեկուսացում, հետեւաբար, ազգային մակարդակից մեկուսացումը տեղափոխվել է տեղական մակարդակ: Եվ, որ շրջանում թվերը բարձր են լինում, այդ տեղական մակարդակները մեկուսանում են: Արա Դարզին կարեւոր համարեց հանրության հետ ճիշտ համագործակցությունը, ինչը, սկզբնական շրջանում Միացյալ թագավորությունում էլ հարթ չի ընթացել եւ խնդիրներ են առաջացել, սակայն դա շտկվել է:
Լուսինե ԲՈՒԴԱՂՅԱՆ
