«Պետական նպաստների մասին» օրենքում փոփոխությունների օրինագծով՝ գյուղական համայնքներում չաշխատող մայրերին մինչեւ երեխայի երկու տարեկանը տրվելու է խնամքի նպաստ, իսկ աշխատող մայրերի նպաստները կրկնապատկվելու են՝ դառնալով 53 000 դրամ:
ԱԺ-ում այսօր օրինագծի քննարկման ժամանակ «Լուսավոր Հայաստան» խմբակցության պատգամավոր Սարգիս Ալեքսանյանը համոզմունք հայտնեց, որ սահմանապահ գյուղերին այս համատեքստում ավելի մեծ արտոնություն պետք է տրվեր՝ հաշվի առնելով նրանց կարգավիճակը:
Օրինագծի զեկուցող, աշխատանքի եւ սոցիալական հարցերի փոխնախարար Սմբատ Սաիյանը պարզաբանեց, որ այս օրինագիծը ժողովրդագրական խնդիր է լուծում, ուստի սահմանամերձ եւ ոչ սահմանամերձ համայնքների միջեւ տարբերություն չեն դրել: Պատգամավորն արձագանքեց, որ մինչեւ օրինագծի երկրորդ ընդունումը պնդելու է իր առաջարկը:
Կարդացեք նաև
«Իմ քայլի» պատգամավոր Սոֆյա Հովսեփյանն էլ հարցադրում արեց՝ իսկ ի՞նչ անեն մարզային քաղաքներում ապրող եւ աշխատող կանայք. «Կենցաղային առումով լուրջ խնդիրներ կան Արթիկում եւ Մարալիկում, որտեղ փոքր երեխայի համար այդ գումարն օգնություն կլիներ: Մաս-մաս խթանելով՝ օգուտ չենք ունենա»: Սմբատ Սաիյանը չհամաձայնեց, որ աստիճանական լուծումների ճանապարհն արդյունավետ չէ. «Իսկ գյուղական բնակավայրերի ընտրությունը պատճառներ ունի: Ըստ ՄԱԿ-ի բնակչության հիմնադրամի ուսումնասիրության՝ գյուղերում ավելի խորը խնդիրներ են արձանագրվել: Իհարկե, ասածս չի ենթադրում, թե քաղաքներում խնդիրներ չկան, բայց այս փուլում միայն գյուղական բնակավայրերն ենք ընդգրկում: Ֆինանսական հնարավորություններն էլ պետք է նկատի ունենանք»:
Լուիզա ՍՈՒՔԻԱՍՅԱՆ
