Կառավարության նախաձեռնությամբ հրավիրված ԱԺ արտահերթ նիստում այսօր քննարկվում է գործադիրի հեղինակած՝ հարկային օրենսգրքում փոփոխությունների օրինագիծը, որը վերաբերում է անշարժ գույքի հարկմանը եւ ըստ որի՝ տեսանելի հարստությունն ավելի մեծ չափով պետք է հարկվի. գույքահարկի վճարը բարձրացվելու է, հարկվելու է նաեւ 3 միլիոն դրամից նվազ արժողության գույքը:
«Առաջարկվում է տեսանելի հարստության կամ ունեցվածքի համար սահմանել ավելի արդարացի հարկային բեռ: Առաջարկվում է վերացնել բնակարանների և բնակելի տների մասով սահմանված չհարկվող շեմերը` բնակարանների մասով մինչև 10 մլն դրամ, բնակելի տների մասով՝ մինչև 7 մլն դրամ գնահատված արժեք ունեցող գույքային միավորների համար սահմանելով 0.05 տոկոս հարկման դրույքաչափ: Սա կնպաստի սեփականության իրավունքի վերաիմաստավորմանը և հարկերի վճարման մշակույթի ամրապնդմանը»,-զեկուցեց ֆինանսների փոխնախարար Արման Պողոսյանը:
Նրա փոխանցմամբ՝ օրինագծով առաջարկվում է սահմանել, որ 2021թ.-ին վճարման ենթակա կլինի անշարժ գույքի նոր արժեքի և նոր դրույքաչափերի հիման վրա հաշվարկված հարկի 25%-ը, 2022թ.-ին` 50%-ը, 2023թ.-ին` 75%-ը. «Այսինքն, հարկման նոր համակարգը ամբողջությամբ կգործի 2024թ.-ից»:
Կարդացեք նաև
«Լուսավոր Հայաստան» խմբակցությունն առաջարկվող փոփոխությունները քննադատեց: Պատգամավոր Արկադի Խաչատրյանը նշեց, որ օրինագիծը մարդակենտրոն չէ, արդար չէ. «Բեռը պետք է համապատասխանի մարդկանց եկամուտներին: Երեւանի կենտրոնում կան մարդիկ, որոնք տնօրինում են բնակարան, բայց չունեն բավարար եկամուտներ՝ թոշակառուներ, հաշմանդամություն ունեցողներ, միայնակ ապրողներ, այլ խմբեր: Նրանք պարտադիր պետք է օգտվեն արտոնություններից կամ լինեն բացառություն: Առանց խորը քննարկումների նման օրինագիծ ներկայացնելը, այն էլ՝ արտակարգ դրության պայմաններում, անթույլատրելի ենք համարում: Քննարկեք, մյուս տարի բերեք այս օրինագիծը»:
Մանե Թանդիլյանն էլ խայտառակություն որակեց օրինագիծը՝ համոզմունք հայտնելով, որ նման հրատապությամբ այն բերելն ու առանց խորքային քննարկման անցկացնելն անընդունելի է:
ԼՀԿ պատգամավոր Էդմոն Մարուքյանն էլ նկատեց, որ համավարակի պայմաններում իշխանությունը քաղաքացիների հարկային բեռը ծանրացնում է. «Ինչո՞ւ է սա անում իշխանությունը համավարակի պայմաններում, արտակարգ դրության ժամանակ: Մարդիկ կգան ցույց կանեն ԱԺ-ի առաջ: Աշխարհը չգիտի, թե անշարժ գույքի շուկան ինչպիսին է լինելու, մինչդեռ մեր իշխանությունն ավելացնում է հարկային բեռը: Միակ բանը, որ կարող եք անել, այս օրինագիծը հետ տանելն է, հետ տարեք, այն մեծ հարված է տնտեսությանը: Դուք շատ վատ բան եք անում, մենք դեմ ենք քվեարկելու»:
Լուիզա ՍՈՒՔԻԱՍՅԱՆ
