«ԱԺ-ում տեղի ունեցածի համար ամոթի զգացում ունեմ»,- ասել էր ՍԴ նախագահ Հրայր Թովմասյանը՝ համարելով նախաձեռնությունը օրենքից դուրս:
Այսօր ԱԺ պետաիրավական հարցերի հանձնաժողովի նախագահ Վլադիմիր Վարդանյանը լրագրողների հետ զրույցում արձագանքելով նրան, ասաց, որ կարող է դիմել իրավապահ մարմիններին. «Ինչ վերաբերում է ամոթի զգացմանը, ապա ամոթի զգացում, իմ կարծիքով, շատ մարդիկ, շատ այլ տեղ, ավելի շատ պիտի ունենային»:
Այս օրերին նաեւ շրջանառության մեջ է դրվել ԱԺ ամբիոնից Վլադիմիր Վարդանյանի այն ելույթը, որտեղ ասում է, որ առաջին կուրսից մենք գիտեինք, որ 213 հոդվածն ԱԺ-ում չի կարող փոխվել, որովհետեւ վերաբերում է դատական իշխանության ձեւավորմանը:
Կարդացեք նաև
Այս առնչությամբ մեր հարցին ի պատասխան Վլադիմիր Վարդանյանն ասաց. «Ես նման բան չեմ ասել: Ես ասել եմ, որ ընդհանրապես զարմանում եմ, թե ինչու 213 հոդվածը, որը թեեւ անցումային դրույթներում էր զետեղված, կարող է փոփոխվել ե՛ւ ԱԺ-ի կողմից, ե՛ւ հանրաքվեի միջոցով, որովհետեւ հոդվածն ամբողջությամբ վերաբերում է դատական իշխանության գլխին ու տրամաբանական կլիներ, որ նրա նկատմամբ կիրառվեր նույն կանոնը, որը կիրառվում է դատական իշխանության վերաբերյալ դրույթների փոփոխման համար: Վերջին շրջանում ես էլ եմ մանիպուլյացիաները տեսնում, թե բա ինչպե՞ս ստացվեց, որ ԱԺ-ն գնաց փոփոխման, բա այսպես էիք ասել: Այն մոտեցումը, որն ամրագրված էր «Հանրաքվեի մասին» որոշման նախագծում ու որը ենթադրում էր մինչեւ 2015-ը նշանակված բոլոր 7 դատավորների պաշտոնավարման ավարտին, ենթադրում էր քաղաքացիների քվեի հայցում: Այս ձեւակերպումները վերաբերում են ոչ թե լիազորությունների դադարեցմանը, այլ մեկ միասնական, միասեռ կարգավիճակով օժտված դատավորների ապահովմանը»:
Վլադիմիր Վարդանյանի մանրամասն բացատրությունը՝ տեսանյութում:
Հռիփսիմե ՋԵԲԵՋՅԱՆ
