Հարևանության և ընդլայնման հարցերով Եվրամիության հանձնակատար Օլիվեր Վարելին կարծում է, որ ԵՄ-ն պատրաստ է քննարկել Ադրբեջանի հետ վիզայի ազատականացման հարցը:
Ինչպես հաղորդում է SchengenVisaInfo.com կայքը, Վարելին այս մասին ասել է Արևելյան գործընկերության երկրների արտգործնախարարների հետ տեսակոնֆերանսի ավարտից հետո տեղի ունեցած առցանց կոնֆերանսի ժամանակ: ԵՄ հանձնակատարի խոսքով՝ առաջիկայում կարող է քննարկվել Արևելյան գործընկերության անդամ երկրների, այդ թվում՝ Ադրբեջանի համար վիզայի ազատականացման հարցը:
«Մեր չափորոշիչները և պայմանները հայտնի են: Եթե մեզ դիմեն նման խնդրանքով, իհարկե կքննարկենք»,-ասել է Վարելին:
Նա նաև ընդգծել է, որ «Արևելյան գործընկերությունը Եվրոպայի համար» գլխավոր առաջնահերթություններից է և կշարունակի այդպիսին մնալ:
Կարդացեք նաև
ԵՄ Բարձր ներկայացուցիչ Ժոզեփ Բորելը ևս մասնակցել է տեսակոնֆերանսին: «Այսօր մենք հստակ ուղերձ ենք հղել Արևելյան մեր գործընկերներին առ այն, որ նույնիսկ ամենաբարդ ժամանակներում կարող են հույսը դնել մեզ վրա: Միևնույն ժամանակ մենք պետք նայենք դեպի ապագան և մտածենք, թե ինչպես լավագույնս կառուցենք այդ հարաբերությունները»,-ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
