Շրջիկ առեւտուր կարող են իրականացնել առավելագույնը 14 ժամով՝ մինչեւ ժամը 23:00-ն: Շրջիկ առեւտրի կետերը պետք է ապահոված լինեն ապրանքների պահման համապատասխան սարքավորումներով, ջրի եւ կեղտաջրերի պահման հերմետիկ՝ 100 լիտրանոց տարաներով: Շրջիկ առեւտրի կետերում չի թույլատրվում վաճառել գյուղատնտեսական ապրանքներ, ծովամթերք, կաթնամթերք: Այսօր այս մասին Երեւանի ավագանու նիստում ասաց Երեւանի քաղաքապետարանի Առեւտրի եւ սպասարկումների վարչության պետ Հովիկ Սաֆարյանը:
Նա ներկայացրեց Երեւան համայնքի վարչական տարածքում շրջիկ առեւտրի կետերին ներկայացվող պահանջները, պայմանները, ժամկետները, շրջիկ առեւտրի իրականացման թույլատրելի վայրերը, դրանց տրամադրման կարգը: Համաձայն այդ կարգի, շրջիկ առեւտրի կետերում չեն կարող մատուցել վարսահարդարման, դիմահարդարման, ինտերնետ ծառայություններ, բանկային կամ արժութային ծառայություններ, կապի եւ հեռահաղորդակցման, բժշկական ծառայություններ, կացարանի տրամադրման, հյուրանոցային ծառայություններ, ցանկացած տեսակի մերսման ծառայություններ:
Պարոն Սաֆարյանը նաեւ հայտնեց, որ շրջիկ առեւտրի կետերի միջոցով վաճառքի կազմակերպման կամ ծառայության մատուցման գործունեությունը կարող են իրականացնել միայն իրավաբանական անձիք կամ անհատ ձեռնարկատերերը՝ Երեւանի քաղաքապետի տրամադրած թույլտվության հիման վրա:
Նախագծի վերաբերյալ մտահոգություն հայտնեց ավագանու ԲՀԿ խմբակցության անդամ Միքայել Մանրիկյանը: Նա չբացառեց, որ շուկան գրավեն խոշոր տնտեսվարողները, որոնք ֆիզիկական անձանց միջոցով փորձեն շուկան վերցնել իրենց ձեռքը:
Կարդացեք նաև
Ավագանու «Լույս» խմբակցության ղեկավար Դավիթ Խաժակյանը փոխանցեց տնտեսվարողներին հուզող հարցերը՝ ի՞նչ նկատի ունեն թունդ ալկոհոլային խմիչքներ ասելով եւ արդյոք գարեջուրը համարվելո՞ւ է թունդ ալկոհոլային խմիչք: Հովիկ Սաֆարյանն ասաց, որ ալկոհոլային խմիչքների դասակարգումը կատարվում է օրենսդրությամբ. «Եթե չեմ սխալվում 40-ից բարձր աստիճանի դեպքում նոր համարվում է ալկոհոլային խմիչք: Եվ ավելի ցածր աստիճանով ալկոհոլային խմիչքի վաճառքը չի արգելվի»:
Նախագիծն անցավ առանց առարկությունների:
Լուսինե ԲՈՒԴԱՂՅԱՆ
