Առողջապահության նախարար Արսեն Թորոսյանն այսօր շրջում էր Շենգավիթ վարչական շրջանում, քաղաքացիներին դիմակ բաժանում եւ հորդորում պահպանել հակահամաճարակային կանոնները: Նա մոտեցավ մի տարեց տղամարդու.
-Նկատեցի, որ դիմակը ճիշտ չեք դրել:
-Խեղդում է…
-Դիմակը կանխարգելելու է, որ չհիվանդանաք եւ ծանր վիճակում չգտնվեք:
Կարդացեք նաև
Ի պատասխան քաղաքացին մատնացույց արեց դիմակի որակը՝ նոր է գնել, բայց կապիչի հատվածից պատռվել է: «Հատկապես երեկոյան, երբ մարդիկ մտածում են, թե չեն երեւում, երբեմն չեն կրում դիմակ՝ ի տարբերություն ցերեկային ժամերի: Մեր խնդիրն այն է, որ սա կենսակերպ դարձնենք՝ չկապելով բնակության վայրի եւ ժամի հետ»,-ուղիղ եթերում արձագանքելով Հանրային հեռուստաընկերության հարցադրմանը՝ ասաց Արսեն Թորոսյանը:
Նրա խոսքով՝ հանրային առողջության պարագայում պարտադրանք պետք է լինի: Ինչ վերաբերում է հակահամաճարակային իրավիճակին, նախարարը տեղեկացրեց, որ այս պահին հասցնում են բոլոր հիվանդներին հոսպիտալացնել, սակայն օրական մոտ 500 նոր դեպք ունենալու դեպքում 7-8 մահ է գրանցվում, ինչն արդեն իսկ ողբերգություն է, հետեւաբար՝ իրավիճակն առողջապահական կարողություններով չի որոշվում: «Կոչ եմ անում սահմանափակել բոլոր տեսակի, այդ թվում՝ սգո արարողություններին մասնակցելը»,-քաղաքացիներին հորդորեց Արսեն Թորոսյանը:
Լուիզա ՍՈՒՔԻԱՍՅԱՆ
