«Անհիմն պատճառով նիստը չկայացավ, բայց նաև այս միջոցով դատավարության մասնակիցներին կոչ եմ անում, որ ժամանակին գան դատարան»,- լրագրողների հետ զրույցում իր գործով նիստի հետաձգման մասին ասաց Դավիթ Սանասարյանը:
Նշենք, որ հունիսի 23-ին Երևանի ընդհանուր իրավասության դատարանում (նախագահող դատավոր Դավիթ Բալայան) լիազորությունները ժամանակավորապես կասեցված ՊՎԾ պետ Դավիթ Սանասարյանի և մյուսների գործով դատական նիստը պաշտպանի ուշանալու պատճառով նախագահող դատավորը որոշեց հետաձգել: Հաջորդ դատական նիստը տեղի կունենա օգոստոսի 10-ին՝ ժամը 10:30-ին:
Հիշեցնենք՝ Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով` պաշտոնեական լիազորությունները չարաշահելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը: Քրեական գործով անցնում է 4 մեղադրյալ։ Սանասարյանից բացի, քրեական գործով անցնում են նաև ՊՎԾ եւս երկու աշխատակից՝ Գևորգ Խաչատրյանը, Սամվել Ադյանը և վերջինիս ընկերը՝ «Զորաշեն» ՍՊԸ-ի փաստացի ղեկավար Տարոն Ավետիսյանը։
Ըստ հեմոդիալիզի գնումների գործով մեղադրանքի՝ Դավիթ Սանասարյանը, հանդիսանալով ՀՀ պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, կարգապահական տույժի ենթարկելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Կարդացեք նաև
Դավիթ Սանասարյանը, անդրադառնալով ուշացման հարցին, հիշեցրեց՝ մի քանի անգամ այս հարցը քննարկվել է: Նա դատավարության կողմից հորդորեց մի քանի րոպե շուտ մտնել նիստերի դահլիճ, որ նման խնդիր չառաջանա:
Բայց նաև հայտնեց, որ նիստը հետաձգելու ժամանակ պաշտպանն արդեն նիստերի դահլիճում էր, ուստի դատավորը կարող էր շարունակել նիստը:
Լրագրողների հարցին՝ միտում տեսնո՞ւմ է, Դավիթ Սանասարյանը պատասխանեց. «Չեմ ուզում նման միտում տեսնել: Էն, որ դանդաղ է տեղի ունենում նիստը, շատ վատ է»:
Լրագրողները հետաքրքրվեցին՝ ՀՀ առողջապահության նախարար Արսեն Թորոսյանը հարցաքննության կանչվելո՞ւ է, Դավիթ Սանասարյանը պատասխանեց. «Մենք ունենք մեր առաջարկները. հաջորդ դատական նիստին կանենք»:
Տաթև ՀԱՐՈՒԹՅՈՒՆՅԱՆ
