«Որևէ մեկը կասկած ունի՞, որ բոլոր իրավական միջոցներով մենք պայքարելու ենք խախտման դեմ: Ես կյանքումս դեռ այս վիճակի մեջ չեմ ընկել, որ պետության դեմ իրավական ձևով պիտի պայքարեմ: Կա դատական ուղի, Եվրոպական դատարան»,- լրագրողների հետ զրույցում հայտարարեց ՀՀ ՍԴ դատավոր Ֆելիքս Թոխյանը:
Հիշեցնենք՝ ՀՀ Ազգային ժողովը հունիսի 22-ին ընդունեց «Իմ քայլի» հեղինակած՝ սահմանադրական փոփոխությունների օրինագիծը, ըստ որի՝ դադարեցվելու են 12 տարի պաշտոնավարած ՍԴ դատավորների լիազորությունները, իսկ օրինագծի՝ ուժի մեջ մտնելուն պես դադարեցվելու են ՍԴ նախագահ Հրայր Թովմասյանի լիազորությունները:
Անդրադառնալով այն փաստին, որ օրինագիծը չի ուղարկվի ՍԴ՝ դատավորն ասաց. «Նախ պետք է նայես ընթացակարգայինը, հետո նոր բովանդակայինի գաս, էս էլ ձեզ շահերի բախման իբր հարցի պատասխանը»:
Լրագրողները հետաքրքրվեցին՝ շարունակելո՞ւ է աշխատել, դատավորն արձագանքեց. «Ես եղել եմ այն դատավորներից, որի նկարներով այստեղ ցույց էին անում պարտադիր կուտակային կենսաթոշակների ժամանակ: Ես 25 տարի ծառայել եմ իմ ժողովրդին. ոչ մի իշխանության չեմ ծառայել: Ժողովուրդն է ասել կարաս գնա, ժողովուրդն էլ կարող է ասել՝ Թոխյան ջան, քեզնից հոգնել ենք, գնա տուն: Վենետիկի հանձնաժողովի կարծիքում հենց դա էլ գրված է, որ նոր եկած իշխանությունները չպետք է խախտեն դատավորների անփոփոխունականության սկզբունքը: Ես կգնամ էլի, ոչ մի խնդիր չունեմ, բայց մեզնից հետո ստեղ պիտի գան, իշխանությունը փոխվելուց հետո այդ իշխանությունը ի՞նչ է անելու՝ ասելու է մերոնք չեն, եկեք հանենք: Թե այս անգամ երեք հոգի են հանում, հետո կարող են 13-ին հանել»:
Կարդացեք նաև
Ֆելիքս Թոխյանը դեմագոգիա համարեց այն կարծիքները, թե ՍԴ-ում դավաճաններ են նստած, դավադրություն են ուզում անել:
Այն հարցին՝ արդյոք ԱԺ խմբակցությունները կարո՞ղ են դիմել ՍԴ օրինագծի սահմանադրականությունը պարզելու համար, ՍԴ դատավորը մինչ բուն պատասխանն ասաց. «Մեր շատ թերություններ գալիս են հենց այս սահմանադրությունից: 2015-ին դեմ եմ եղել մի քանի կետերին, դեմ եմ եղել պառլամենտական համակարգին»:
Պարզաբանելով խորհրդարանական խմբակցությունների՝ ՍԴ դիմելու հարցը՝ նա ասաց. «Ոչ մի խմբակցություն առանձին չունի այդ իրավունքը: Կգան, թե ոչ, այդ իրավունքը միասին վերցրած ունեն. առնվազն 27 պատգամավոր: Միայն մեկ խմբակցություն չունի այդ իրավունքը»:
Ֆելիքս Թոխյանը ևս մեկ անգամ վստահեցրեց՝ բոլոր հնարավոր միջոցներով դիմելու են. անհատական իրավունքների խախտում է և շարունակեց. «Բոլորս պարտավորություններ ունենք. վարկեր ունեմ, ո՞վ է դրանք փակելու, պիտի ասենք շնորհակալություն, որ հարց բարձրացրիք՝ թոշակը տալու եք, թե ոչ, մնացել է թոշակն էլ մեզ չտաք: Ես կյանքումս ոչ մի բանից չեմ վախենում, բացի նրանից, երբ իմ հինգ թոռնիկներից մեկը հիվանդանում է: Ամեն ինչ տեսել եմ, ոչ մեկը կառչած չէ աթոռից, երեք բուհից ունեմ առաջարկություններ, չենք կորչելու: Խնդիրն այն է, որ ամեն բան անենք սահմանադրական ուղիով, երկխոսությամբ: Վենետիկցիներն ասել են՝ 12 տարի ես ուզում, անցումային շրջան տուր. այն մասը, որն իրենց ձեռք չի տալիս, չեն ընդունում»:
Ֆելիքս Թոխյանը լրագրողներին հորդորեց չդրդել իրեն զբաղվել քաղաքականությամբ ու ասաց. «Եկեք ինձ մի դրդեք քաղաքականությամբ զբաղվել: Ես սաղ կյանքում ոչ մի կուսակցության անդամ չեմ եղել: Ինձ 1997 թվականին խաբեցին, ամբիոնի վարչությունից բերեցին ՍԴ: Ոչ մի պետական պաշտոն չեմ զբաղեցրել, սաղ կյանքս եղել եմ սոված գիտնական: Ինչ անում են, թող անեն Սահմանադրությամբ: Հարցի լուծումն այդքան հրատապ չէր, որ ինձ համար հասկանալի լիներ: Այսօր այս կորոնավիրուսի վիճակում ինձ համար բարդ է հասկանալ արագացված այս մոտիվացիան: Պառլամենտում եղան բացարձակ հերյուրանքներ, ելույթներ, թե ափալ-թափալ նիստ ենք արել Ռոբերտ Քոչարյանի գործի մասով: Ամոթ է. դա բնական մեր ընթացքն է: Վենետիկի հանձնաժողովի որոշումը ստացել ենք ուրբաթ, հետո օրակարգային տասը հարցերի մեջ ավելացրել ենք այդ հարցը. պետք է վերսկսենք քննությունը, քանի որ հիմքը, որով կասեցրել ենք, վերացել է: Դեռ կարող էինք շատ ավելի շուտ նշանակել նիստը, եթե նման միտք ունենայինք, ինչպես մեր հասցեին հերյուրանքներ են հնչեցնում»:
Տաթև ՀԱՐՈՒԹՅՈՒՆՅԱՆ
