«Վենետիկի հանձնաժողովի կարծիքը հրապարակվել է հունիսի 18-ին, երբ մեր օրակարգը կազմված էր: Սահմանադրական դատարանի մասին օրենքի համաձայն, երբ գործի կասեցման հիմքերը վերանում են, մենք պարտավոր ենք անհապաղ սկսել գործի քննությունը»,- լրագրողների հարցին՝ հունիսի 22-ին ՍԴ-ում անցկացված աշխատակարգային նիստի օրակարգում վերջին պահին ինչո՞ւ է ավելացվել ՀՀ երկրորդ նախագահ Ռոբերտ Քոչարյանի փաստաբանների դիմումի քննությունը վերսկսելու հարցը, այսպես պատասխանեց ՍԴ նախագահի տեղակալ Ալվինա Գյուլումյանը:
Նա նաև հայտնեց, որ ՍԴ կանոնակարգի համաձայն՝ օրակարգը պետք է հաստատվի. այնտեղ կարող են կատարվել ավելացում և հարցեր հանվել:
Նա նաև տեղեկացրեց, որ նշանակված լինելով նախորդ Սահմանադրության պայմաններում՝ նոր Սահմանադրության համապատասխան ընտրվել է ՍԴ նախագահի տեղակալ:
Հարցին՝ որքանո՞վ է հավանական, որ Ռոբերտ Քոչարյանի մեղադրանքը հակասահմանադրական ճանաչվի, նա ասաց. «Ես ոչինչ չեմ կարող ասել, դա գործ է, որ մենք պետք է քննենք: ՍԴ դատավորը և ընդհանրապես դատավորն իրավասու չէ նախապես կարծիք հայտնել իր վարույթում գտնվող գործի վերաբերյալ»:
Կարդացեք նաև
Հարցին՝ Ռոբերտ Քոչարյանի գործով ՍԴ-ն ե՞րբ որոշում կկայացնի, նա պատասխանեց. «Չգիտեմ՝ նախագիծը պատրաստ կլինի՞, թե ոչ: Կարող են դատավորները լրացուցիչ հարցեր տալ»:
Տաթև ՀԱՐՈՒԹՅՈՒՆՅԱՆ
