Ազգային ժողովի փոխխոսնակ Ալեն Սիմոնյանը հանդես է եկել օրենսդրական նախաձեռնությամբ, որով առաջարկում է սոցիալական ցանցերում և լրատվամիջոցներում հրապարակված վիրավորանքի և զրպարտության համար փոխհատուցման չափը վիրավորանքի դեպքում 1 միլիոն դրամից դարձնել 5 միլիոն դրամ, զրպարտության դեպքում` 2 միլիոնից 10 միլիոն դրամ:
«Լրագրողներ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանը կարծում է, որ իշխանությունները պետք է լրջորեն մտածեն սոցիալական ցանցերում ատելության քարոզի դեմ պայքարի մասին:
Վիրավորանքի ու զրպարտության համար նախատեսված տուգանքների չափերի ավելացման վերաբերյալ իրավապաշտպանը միանշանակ կարծիք չունի: Նա գտնում է, որ առաջնային պետք է լինի պայքարը ատելության խոսքի տարածման դեմ:
Հետևաբար՝ նախագծի արդյունավետության մասով իրավապաշտպանը դժվարացավ տեսակետ հայտնել: Նրա խոսքերով՝ մեկ այլ խնդիր ևս կա. Հայաստանում դատական պրոցեսները, քաղաքացիական գործերը տարիներ են տևում: «Չեմ կարծում՝ օգտակար կլինի այդ տուգանքների չափերի բարձրացումը: Մեզ մոտ մթնոլորտն ավելի վատ է, քան այդ վիրավորանքն ու զրպարտությունը: Դուք տեսնում եք՝ համացանցում ինչ է կատարվում: Ատելության խոսքն է»,- ասաց Ժաննա Ալեքսանյանը:
Կարդացեք նաև
Իրավապաշտպանը համոզված է, որ պետք է լրատվամիջոցներով, հեռուստատեսությամբ ատելության խոսքը զսպող մեխանիզմներ մշակել:
Քրիստինա ԱՂԱԼԱՐՅԱՆ
Հոդվածն ամբողջությամբ՝ «Ժամանակ» օրաթերթի այսօրվա համարում:
