Վարակի տարածվածությամբ ու մահացության թվով տարածաշրջանում արդեն «մատի փաթաթան» ենք դարձել, մի բուռ ժողովրդին օգնության ձեռք են մեկնում մեզնից կրկնակի ու եռակի շատ բնակչություն ունեցող երկրները, որոնք կարողացել են առանց դժոխքի անցնել այս փուլը, որտեղ երկրի ղեկավարը չի հայտարարում, թե դժոխքում են ու միևնույն ժամանակ սահմանադրության կոպիտ խախտմամբ խորհրդարանին լծում ՍԴ անդամների հարցերը լուծելու «սուրբ» գործին։ Իսկ դուք ասում եք՝ պատերազմ է, ծպտուն մի հանեք, թողեք իշխանությունը պայքարի վարակի դեմ։ Բայց համոզվա՞ծ եք, որ իշխանությունը վարակի դեմ է պայքարում, թե՞…
Երեկ ողջ օրը իրավաբանները բաձրաձայնում էին խորհրդարան ներկայացված Սահմանադրական դատարանի վերաբերյալ «Իմ քայլը» խմբակցության կողմից շրջանառության մեջ դրված նախագծի հակասահմանադրականության մասին։ Բայց օրենքները շրջանցելու հարցում ո՞վ էր կասկածում այս իշխանության հնարավորություններին։ Ավելին, ըստ այդ նախագծի, ամեն ինչ թողել են խորհրդարանին, կառավարությունն իրեն դուրս է դրել գործընթացից, այսինքն՝ օրենք ստեղծող մարմինը դառնում է օրենք խախտողը։ Բայց էլի զարմանալի չէ, որովհետև այն պահին, երբ խորհրդարանը լցվեց տարատեսակ կենտրոններից ուղղորդվող, կենսագրություն չունեցող մարդկանցով, ակնհայտ էր, որ ամեն խելքին փչածն օրենք է դառնալու։
Ենթադրենք, ՍԴ-ի կազմն էլ փոխեցիք, հետո՞։ Ներդրումնե՞ր են հոսելու երկիր, տնտեսությո՞ւնն է ոտքի կանգնելու, դո՞ւք եք դառնալու պատասխանատու և առանց պարգևավճարների «նվիրյալներ», թե՞ հերթական լծակն էլ գրպանում ունենալով, որոշելու եք՝ ով է լինելու իշխանությանը չսպասարկող, անհնազանդ հերթական թիրախը։ Չլինի՞ լրատվամիջոցները։
Ռուզան ԽԱՉԱՏՐՅԱՆ
Կարդացեք նաև
Հոդվածն ամբողջությամբ՝ «Իրատես» թերթի այսօրվա համարում:
