Երկրորդ նախագահ Ռոբերտ Քոչարյանի կալանքի հարցով դատարանը որոշեց գրավով ազատ արձակել, ԲՀԿ առաջնորդ Գագիկ Ծառուկյանը չկալանավորվեց: Այս առնչությամբ այսօր ԱԺ-ում լրագրողների հետ զրույցում «Իմ քայլը» խմբակցության պատգամավոր Հովհաննես Իգիթյանն ասաց. «Ռոբերտ Քոչարյանի խափանման միջոցը այդ գործի մեջ չորրորդական է: Հիմնական գործը, այն, որ արդեն պատրաստ է մեղադրանքը, ինձ դա է կարեւոր: Ես մտածում եմ՝ ինչո՞ւ մեկուկես տարի տեւած գործը, արդեն մեղադրանքը պատրաստ է, առաջին ատյանի դատարանը չի կարողանում սկսել պրոցեսը: Ես նաեւ ականատես եմ եղել, եղել եմ նաեւ հետապնդվող այն ժամանակ: Ես փորձում եմ օբյեկտիվ լինել ու չպատմել իմ ընտանիքի հանդեպ, նաեւ իմ անձնական ու բոլոր հետապնդումները: Ես ուզում եմ, որ գործը մտնի առաջին ատյանի դատարան ու հասարակությունը այն, ինչ մենք տեսել ենք, իմանա: Եթե դա չտեղավորվի մեր՝ քրեական պատասխանատվության եւ հասարակության պատկերացումների մեջ, ապա այդ մարդը ապացուցի, որ մեղավոր չէ»:
Իգիթյանի խոսքով՝ «Սկզբում Ռոբերտ Քոչարյանն ասում էր, որ ինքը տեղյակ չէ, որ բանակը ներգրավված է պրոցեսում, հետո ասեց՝ նայեք, իմ ստորագրությունը չի, այլ՝ Պն նախարարի, ես տեղյակ չեմ, հետո ասեց՝ դա բանակ չէր: Մի շատ կարեւոր հանգամանք կա, որ ինձ համար մտահոգիչ է ոչ որպես պատգամավոր, այլ՝ որպես Հովհաննես Իգիթյան: Երբ ես լսեցի Վերաքննիչ դատարանի դատավորի հարցերը եւ այդ երկխոսությունը Ռոբերտ Քոչարյանի հետ, մի բան կար, որ ինձ համար անընդունելի է: Ես տեսա, որ դատավորը տանում է դիսկուրս դեպի այն արժեքին, որն իր համար երեւի արժեք է ներկայացնում, դա գումարն է ու որը իր պատկերացմամբ արժեք է ներկայացնում Ռոբերտ Քոչարյանը:
Դատավորը հարց էր տալիս՝ արդյոք այդ գումարը բավարա՞ր է ձեզ համար, որ դուք ափսոսաք ու կաշկանդված լինեք այդ գումարը կորցնեք ու ո՞րն է այդ գումարը՝ 2 մլն, 3 մլն, հետո եղավ 2 մլրդ դրամ: Ինձ համար էական չի գումարը, ինձ համար էական է, որ դատավորի համար արժեքը, որով մարդը չի խուսափելու դատական պրոցեսից, դա գումարն է: Ինձ համար այդպես չէ: Ես չգիտեմ՝ Ռոբերտ Քոչարյանի համար այս 2 մլրդ-ը մե՞ծ գումար է, թե՞ չէ, բայց ես գիտեմ հստակ՝ այն մարդիկ, որոնք Հայաստանից խուսափելով փախել են որոշ քրեական պատասխանատվությունից, մի քանիսը ՌԴ-ում են գտնվում, մեկ-երկուսը՝ Եվրոպայում, իրենք այստեղ թողել են առնվազն 5 անգամ, եթե ոչ 10 անգամ ավել գրավ գումար, այսինքն՝ իրենց ունեցվածքը եւ փախել են ՀՀ-ից:
Ես չեմ ուզում, որ մեր մոտ նախադեպ դառնա, որ վաղը մարդասպանին, գողին կամ խարդախին խափանման միջոցը ընտրվի ոչ թե նրանով, թե նա հասարակության համար ինչքանով է վտանգ ներկայացնում, կարող է խոչընդոտել դատական պրոցեսին, այլ ընտրվի այնպիսի գումար, որ այդ մարդու համար դա համարվի զգալի գումար, ինչի համար նա կարող է ափսոսալ»:
Կարդացեք նաև
Խոսելով այն մասին՝ արդյոք այս գործերը քաղաքական հետապնդում չե՞ն՝ Իգիթյանն ասաց, որ ինքն իր մաշկի վրա է զգացել այն, թե ինչ է քաղաքական հետապնդումը. «Հավատացեք, այն քաղաքական հետապնդումը, որն իրոք հետապնդում էր, մարդկանց անհայտ ձեւով վերցնում էին ու բոլոր դատավորներն անում էին այն, ինչ ուզում էին իշխանությունները: Հիմա դատարաններն անո՞ւմ են այն, ինչ ուզում է իշխանությունը»:
Հռիփսիմե ՋԵԲԵՋՅԱՆ
