«Իմ քայլը» խմբակցության պատգամավոր Հովհաննես Իգիթյանն այսօր լրագրողների հետ զրույցում ասաց, որ Վենետիկի հանձնաժողովը հստակորեն պատասխանել է այն 3 հարցերին, որոնք ուղղվել էին ու այդ հարցերի պատասխանը դրական է. «Անցումային դրույթի հետ կապված եղել է նաեւ, ես գիտեմ ում կողմից, սխալ թարգմանություն: Պետք է հաշվի առնենք, որ ժամանակը անցումային քիչ չէ, արդեն տեւում է 5 տարի: Այն անցումային դրույթը 2015-ին, որը պետք է ուժի մեջ մտներ 2017-ին, նախատեսված էր, որ ՍԴ այս մոդելը, որն այսօր կա ու ինչի համար մենք այսօր արտահերթ նիստ ենք արել, այս մոդելը պետք է ուժի մեջ մտներ 2017-ի ապրիլին 9-ից հետո: Ես չեմ ուզում հիմա խորանամ, թե ինչ է եղել այն ժամանակ, մանիպուլյացիա էր, ես կասեի, նույնիսկ, խարդախություն՝ նախորդ իշխանության կողմից, ինչի հետեւանքով Սահմանադրություն գրած մարդը մինչեւ իր կյանքի վերջը ստացել է իրավունք լինելու ՍԴ նախագահ: Բայց մենք հիմա անհատների հարցը չենք լուծում: Ինչպիսի՞ ՍԴ պետք է ունենա երկիրը: Այն, ինչը կստացվի այսօր, դա ամենամոտն է այն ընտրված մոդելին, որով ապրում են զարգացած երկրում»:
Մեր հարցին՝ ԵԽ գլխավոր քարտուղարն ասում է, որ պետք է Վենետիկի հանձնաժողովի տեսակետները հաշվի առնելով լուծվի ՍԴ ճգնաժամը՝ 2015-ի Սահմանադրության սահուն դրույթներն իրականացնելով ու հիմա, երբ անցումային դրույթները չենք պահում, ի՞նչ է մեզ սպասվում՝ Իգիթյանը պատասխանեց. «Դուք նախ՝ փորձել եք մեկնաբանել այն, ինչ ասել է գլխավոր քարտուղարը: Ինքն ասել է, որ մենք պետք է առաջինը համագործակցենք Վենետիկի հանձնաժողովի հետ, որը մենք անում ենք: Այն երեք հարցերի պատասխանը, երբ դիմել է մեր կառավարությունը, այդ պատասխանները համահունչ են այն նախաձեռնության հետ, որը մենք այսօր ունենք: Շատ դժվար է հասկանալ՝ անցումային փուլը ինչքա՞ն պետք է տեւի: Սահմանադրության հեղինակները նախատեսել են երկու տարի՝ որպես անցումային փուլ, ու այդ անցումային փուլը տեւում է 5 տարի, եթե մենք չմիջամտեինք, կտեւեր ընդհանրապես մինչեւ 2040 թիվը»:
Դիտարկմանը, որ ընդդիմությունը բոյկոտում է այս գործընթացն ԱԺ-ում ու համարում է սա հակասահմանադրական՝ Իգիթյանն արձագանքեց. «Թող ամեն մեկը չորոշի, որ ինքը կարող է գնահատականներ տալ՝ ինչն է սահմանադրական, ինչը՝ ոչ սահմանադրական: Փողոցում, քաղաքական նույնիսկ կենսագրություն չունեցող մարդը, ունենալով խոսափող, չգիտեմ որտեղից ցանկացած պրոցես ԱԺ-ում համարում է ոչ սահմանադրական: Դա չի նշանակում, որ սահմանադրությանը հակասող պրոցես է: Ցանկացած մարդ, որը կարող է կարդալ, կարող է բացել եւ տեսնել ԱԺ-ի լիազորությունները՝ սահմանադրության հոդվածների փոփոխման հետ կապված: Դա միանշանակ է, այստեղ որեւէ հակասահմանադրական բան չկա»:
Կարդացեք նաև
Հռիփսիմե ՋԵԲԵՋՅԱՆ
