Այսօր ԱԺ ճեպազրույցի ժամանակ ԲՀԿ խմբակցության պատգամավոր Շաքե Իսայանը արտախորհրդարանական ուժերի հետ համագործակցության մասին հարցին ի պատասխան՝ ասաց. «Մենք ֆիքսենք մեկ բան հստակ՝ մեր խմբակցությունը թաքուն, մութ պայմանավորվածությունների չի գնում, ինչպիսի ուժերի հետ էլ որ համագործակցում ենք»:
Հարցին՝ մինչեւ դատարանի՝ կալանավորելու վերաբերյալ որոշումը, երբ Ծառուկյանի առանձնատունը սկսվեց ցուցադրվել, Ծառուկյանն ի լուր աշխարհի հայտարարեց՝ անբարոյականի տղա լինեմ, թե հետ կանգնեմ, ի՞նչ է սա նշանակում՝ շարունակելո՞ւ եք պահանջել կառավարության հրաժարականը եւ չկալանավորելու որոշումն ինչպես է անդրադարձել ձեր պլանների վրա, հնարավո՞ր է կրկնվի 2015-ի սցենարը՝ Իվետա Տոնոյանը պատասխանեց. «Մենք խոսել ենք մեր մտահոգությունների, երկրում արմատական փոփոխություն իրականացնելու մասին, որեւէ փոփոխություն չի եղել մեր տեսակետներում: Ինչ վերաբերում է 2015-ի հետ համեմատականներին, որոնք հետեւողականորեն որոշ ԶԼՄ-ների կողմից իրականացվում են, որեւէ դեպքում համեմատական նախկինի ու ներկայի միջեւ չենք ուզում անցկացնել: 2015-ին կար իրավիճակ, երբ մեկ գիշերվա մեջ մեր շուրջ 700 համակիրներ ձերբակալվել էին, փորձ էր արվում ներկայացնել, որ համաժողովրդական պայքարը իրականացվում է ինչ-ինչ անձնական նկատառումներով, կար պայթյունավտանգ իրավիճակ, երբ հնարավոր էր ամեն բան ու Գագիկ Ծառուկյանը հայտարարեց, որ փակում է այդ քաղաքական էջը, որպեսզի որեւէ ողբերգական հետեւանք ու արդյունք չունենա, որեւէ հայի արյուն չթափվի, ինչը կլիներ ամենասարսափելի բանը: Այսօր ունենք Գագիկ Ծառուկյանի եւ մեր քաղաքական թիմի 100 տոկոսանոց հաստատակամությունը՝ մեր երկրում փոփոխություններ իրականացնելու՝ դուր գա՞ դա ոմանց, թե դուր չգա, մենք շարունակելու ենք առաջնորդվել մեր նախանշած օրակարգով»:
Հարցերին, թե ի՞նչ գործիքակազմ եք օգտագործելու, ՌԴ-ից Ծառուկյանն աջակցություն ունի՞, Վանեցյանի հե՞տ եք համագործակցելու՝ Տոնոյանը պատասխանեց. «Մենք ունենք գործընկերներ, այդ մասը հրապարակային է, մենք թե՛ «Հայրենիք» կուսակցության, թե՛ ՀՅԴ-ի հետ ունենք քննարկման եզրեր՝ մեկ միասնական օրակարգ ձեւավորելու վերաբերյալ, հիմա քաղաքական քննարկումների փուլում ենք: Եթե ձեզ թվում է, որ քաղաքական գործընթացները տեղի են ունենում մեկ գիշերվա մեջ քնելով եւ զարթնելով եւ ասելով՝ ալե հոպ, դուք չարաչար սխալվում եք: Ի՞նչ է նշանակում՝ դուք խոսելո՞ւ եք, թե՞ գործելու եք, իհարկե, մենք գործելու ենք»:
Կարդացեք նաև
Aravot.am-ը հարցրեց՝ նախկին գումարման ԱԺ-ում, երբ Ընտրական օրենսգիրքն էր քննարկվում, ՀՅԴ-ն տարբեր ակնարկներով ու հայտարարություններով ասում էր, որ Ծառուկյանը բարեգործության անվան տակ քարոզարշավին իրականում այլ բան է անում, հիմա դուք այդ ուժի հետ ո՞նց եք համագործակցում՝ Իվետա Տոնոյանն ի պատասխան հորդորեց. «Խնդրում եմ անցյալի վերհուշներով չապրել: Եղել է քաղաքական իրավիճակ: Մենք այսօր միանգամայն այլ քաղաքական իրավիճակ ունենք: Քաղաքականության մեջ չկան ոչ հավերժական թշնամիներ ու հավերժական բարեկամներ»:
Հռիփսիմե ՋԵԲԵՋՅԱՆ
