«Դավիթ Հարությունյանը հայտարարել է, որ Վենետիկի հանձնաժողովն ակնհայտորեն իրավունքը ծառայեցրել է օրվա իշխանության քաղաքական նպատակներին եւ իրավիճակը ներկայացրել միայն կառավարության դիրքորոշման տեսանկյունից: Այս գործչի մեղադրանքի հիմքում ի՞նչը կարող է լինել՝ հանձնաժողովի արտահայտած կարծիքի մասին»,-ԱԺ արտահերթ նիստում այսօր արդարադատության փոխնախարար Ռուստամ Բադասյանին նման հարցադրում հղեց ԱԺ փոխնախագահ Ալեն Սիմոնյանը:
Հիշեցնենք, որ «Իմ քայլի» նոր օրինագծով՝ 12 տարի պաշտոնավարած ՍԴ դատավորները պետք է դադարեցնեն պաշտոնավարումը, իսկ օրինագծի ուժի մեջ մտնելու արդյունքում ՍԴ գործող նախագահ Հրայր Թովմասյանի լիազորությունները դադարեցվելու են: ԵԽ Վենետիկի հանձնաժողովն այս օրինագծի վերաբերյալ այսօր է կարծիք հրապարակել:
Ռուստամ Բադասյանը, որն օրինագծի հարակից զեկուցողն է, ցավ հայտնեց, որ նշյալ գործչի կողմից նման հայտարարություն է հնչել. «Վենետիկի հանձնաժողովի կարծիքը բավականին հավասարակշռված է: Նման հեղինակավոր կառույցը չի կարող որեւէ կերպ եւ որեւէ դեպքում իր հեղինակությունը, իրավունքի սկզբունքները մի կողմ դնի եւ որեւէ երկրի իշխանության համար «հարմար» տարբերակ մատուցի: Սա միանշանակ է: Կարծում եմ՝ Վենետիկի հանձնաժողովին քաղաքականացված լինելու մեջ մեղադրելն անընդունելի է»:
Կարդացեք նաև
Լուիզա ՍՈՒՔԻԱՍՅԱՆ
