«Վենետիկի հանձնաժողովն այն մոտեցումը, որ դրված է այս փոփոխության հիմքում՝ դատավորներ կարգավիճակի հավասարեցման առումով, ողջունել է եւ պաշտպանում է: Դա օրինագծի առանցքն է, որի շուրջ հանձնաժողովի հետ ըմբռնում կա»,-ԱԺ արտահերթ նիստում այսօր արձագանքելով «Իմ քայլի» պատգամավոր Թագուհի Թովմասյանի նկատառմանն այն մասին, որ Վենետիկի հանձնաժողովը որոշակի դիտարկումներ էր ներկայացրել այսօր քննարկվող օրինագծի վերաբերյալ՝ ասաց «Իմ քայլի» պատգամավոր Վահագն Հովակիմյանը:
Հիշեցնենք, որ «Իմ քայլի» նոր օրինագծով՝ 12 տարի պաշտոնավարած ՍԴ դատավորները պետք է դադարեցնեն պաշտոնավարումը, իսկ օրինագծի ուժի մեջ մտնելու արդյունքում ՍԴ գործող նախագահ Հրահր Թովմասյանի լիազորությունները դադարեցվելու են:
Հովակիմյանը շեշտեց. «Շատ շնորհակալ ենք հանձնաժողովին, գործակցությունն արդյունավետ էր, բայց նրբություններ կան: Մենք իրացնում ենք այն ճանապարհը, որը մեր համար նախընտրելի է՝ հաշվի առնելով իրողությունը»:
Հովակիմյանը նշեց՝ այս օրինագիծն առաջին ընթերցմամբ է քննարկվում, իսկ օրինագծի վերաբերյալ ՍԴ դիմելու հարցին պետք է անդրադառնան երկրորդ ընթերցման քվեարկությունից առաջ. «Այս պահին այդ խնդրին չենք անդրադառնում»:
Կարդացեք նաև
Թագուհի Թովմասյանը հարցրեց՝ եթե Վենետիկի հանձնաժողովի խորհուրդը չպետք է չլսեինք, ապա ինչո՞ւ էին հարցնում առհասարակ: Վահագն Հովակիմյանը քմծիծաղով պատասխանեց. «Իրականում մենք հենց հանձնաժողովի կարծիքով ենք առաջնորդվում: Մենք հենց հանձնաժողովի կարծիքը հաշվի առնելով ենք այս օրինագիծը ներկայացնել»:
Լուիզա ՍՈՒՔԻԱՍՅԱՆ
