Հայաստանում սահմանադրական ճգնաժամը կարող է լուծվել Վենետիկի հանձնաժողովի առաջնորդությամբ: Այս մասին ասվում է Եվրոպայի խորհրդի գլխավոր քարտուղար Մարիա Պեյչինովիչ Բուրիչի հայտարարության մեջ:
«Վենետիկի հանձնաժողովի կարծիքը, որն ընդունվել է հունիսի 19-ին և հանրայնացվել այսօր, հնարավորություն է տալիս լուծել այն խնդիրները, որոնք եղել են սահմանադրական ճգնաժամի կենտրոնում՝ Հայաստանի Ազգային Ժողովի և Սահմանադրական դատարանի միջև»,-ասվում է հայտարարության մեջ:
ԵԽ գլխավոր քարտուղարի հայտարարության մեջ նշվում է, որ Վենետիկի հանձնաժողովը պարզաբանել է Սահմանադրական դատարանի վերանայման շրջանակը՝ Սահմանադրական փոփոխությունների գործընթացում, և ընդունել է Ազգային ժողովի՝ հանրաքվեի մասին իր իսկ որոշումը չեղարկելու իրավունքը: Ավելին, հանձնաժողովը ընդունել է, որ 2015թ. Սահմանադրության դրույթների լիարժեք կատարումը, որոնք վերաբերում են Սահմանադրական դատարանի կազմին, օրինական է: Որպեսզի այս նպատակը համադրվի դատավորների պաշտոնավարման ժամկետի և անկախության պահպանման անհրաժեշտության հետ, Վենետիկի հանձնաժողովն առաջարկել է, որ այն դատավորները, ում 12-ամյա պաշտոնավարման ժամկետը դեռ չի լրացել, շարունակեն պաշտոնավարել մինչ ժամկետի ավարտը, իսկ այն դատավորները, որոնք արդեն իսկ 12 տարի պաշտոնավարել են, մինչև փոխարինվելը պետք է կարողանան օգտվել անցումային նոր ժամկետից, որի տևողությունը պետք է որոշեն Հայաստանի իշխանությունները:
Հանձնաժողովն ափսոսանք է հայտնել, որ փոփոխությունները, որոնք չեն նախատեսում նման անցումային ժամկետ, Ազգային ժողովում քննարկման են դրվել հանձնաժողովի կողմից կարծիքի ընդունման օրը:
Կարդացեք նաև
«Իշխանություններին կոչ եմ անում առաջնորդվել Վենետիկի հանձնաժողովի առաջարկություններով՝ սահմանադրական ճգնաժամը հաղթահարելու համար՝ 2015թ. սահմանադրական դրույթների սահուն կատարմամբ և Եվրոպայի խորհրդի չափորոշիչներին համապատասխան»,-եզրափակել է Բուրիչը:
Պատրաստեց՝ Վիկտորյա ԱՆԴՐԵԱՍՅԱՆԸ
