Քիչ առաջ Երեւանի ընդհանուր իրավասության դատարանում ավարտվեց ԲՀԿ առաջնորդ Գագիկ Ծառուկյանին երկու ամսով կալանավորելու վերաբերյալ ԱԱԾ-ի միջնորդության քննությունը, դատարանի որոշումը կհրապարակվի կիրակի:
«Որ կալանավորելու, ձերբակալելու միջնորդություն ներկայացնեն ազգային օլիմպիական կոմիտեի նախագահին, երկրորդ ընդդիմադիր քաղաքական ուժին, մենակ մի բան կասեմ՝ եթե երկրի վիճակը, համաճարակը, տնտեսական անկումը, եթե պատճառը ես եմ, եթե ես եմ մեղավոր, պատրաստ եմ ինքնակամ գնալ պատիժը կրելու: Բայց նորից եմ ասում, որ այս ամենը ինձ համար շատ զարմանալի է»,-լրագրողներին ասաց Գագիկ Ծառուկյանը: Հիշեցնենք, որ նրա առնչությամբ ԱԱԾ-ն երեք հաղորդագրություն է տարածել:
Հարցին՝ «այն ժամանակ, երբ ԲՀԿ-ն գործադիրի մաս էր, ձեր հետ առնչվող մարդկանց հետ կապված քրեական գործեր կային, այդ ժամանակ ինչո՞ւ չէիք ասում, որ քաղաքական հետապնդում է», Ծառուկյանն այսպես պատասխանեց. «Ես կասկածում էի, բայց իրավունք չունեի դա արտահայտելու: Միշտ մտածել էի, որ քննությունը պետք է կատարվի: Բայց այսօր ասածներիս տեր եմ»: Հիշեցնենք, որ Ծառուկյանն ու ԲՀԿ-ն գործընթացը քաղաքական հետապնդում են որակում:
Լուիզա ՍՈՒՔԻԱՍՅԱՆ
