Երեւանի ընդհանուր իրավասության դատարանի Շենգավիթի նստավայրում շարունակվում է ՀՀ ԱԺ պատգամավոր Գագիկ Ծառուկյանին կալանավորելու վերաբերյալ ԱԱԾ միջնորդության քննությունը:
Հիշեցնենք, որ ավելի վաղ նիստն ընդմիջվել էր: Գագիկ Ծառուկյանի պաշտպանական խումբը դատարանին ինքնաբացարկի միջնորդություն էր ներկայացրել: Դատարանը հեռացել էր խորհրդակցական սենյակ ինքնաբացարկի միջնորդության վերաբերյալ որոշում կայացնելու: Պաշտպան Երեմ Սարգսյանը լրագրողներին ասել էր, որ դատարանը 2-3 ժամվա ընթացքում կհրապարակի իր որոշումը: Պաշտպանը նաեւ չէր բացառել, որ դատարանն այսօր շարունակի կալանավորման միջնորդության քննությունը:
Դատարանի շենքի մոտ շարունակում են հավաքված մնալ Գագիկ Ծառուկյանի կողմնակիցները՝ այդ թվում ԱԺ պատգամավորներ, Երեւանի ավագանու անդամներ: Ոստիկանները մի քանի քաղաքացու բերման ենթարկեցին, պատճառաբանելով, որ խախտում են կարգն ու հավաք են կազմակերպել: Ոստիկաններն անգամ լրագրողներին թույլ չէին տալիս անցնել ոստիկանական պատնեշը, պնդելով, որ այդ դեպքում կխանգարվի քաղաքացիների անցուդարձը:
Այս պահին դատարանը դեռ չի հրապարակել իր որոշումը: Նաեւ հայտնի չէ, կալանավորման միջնորդության վերաբերյալ նիստը շարունակվում է, թե ոչ:
Կարդացեք նաև
Նելլի ԳՐԻԳՈՐՅԱՆ
