ԲՀԿ խմբակցության պատգամավորները հանդիպումներ են ունենում դիվանագիտական կորպուսի ներկայացուցիչներ հետ. այս մասին, այսօր, լրագրողների հետ զրույցում ասաց ԲՀԿ խմբակցության պատգամավոր, Գագիկ Ծառուկյանի մամուլի խոսնակ Իվետա Տոնոյանը: Հանդիպումների ժամանակ քննարկվում է երկրում ստեղծված իրավիճակը: Հանդիպումներում քննարկումերի այլ մանրամասներին Իվետա Տոնոյանը չանդրադարձավ. «Հանդիպումները եղել են ոչ միայն ՌԴ, այլ նաեւ այլ բազմաթիվ դեսպանների հետ: Հանդիպումները արդեն երկու օր է շարունակվում են: Երեկ հանդիպումներ են տեղի ունեցել ՌԴ եւ Ղազախստանի դեսպանների հետ, բայց հանդիպումների շարքը շարունակական է լինելու»:
Իվետա Տոնոյանը հավաստիացրեց` Գագիկ Ծառուկյանի տրամադրությունը շատ բարձր է, իրենց օրակարգում էլ որեւէ բան չի փոխվել. «Այո, մեր երկրում պետք է իրականացվեն արմատական փոփոխություններ, այդ թվում նաեւ կառավարության 100 տոկոս փոփոխություն, ներառյալ նաեւ Նիկոլ Փաշինյանի»:
Հիշեցնելով`«Հայրենիք», «Մեկ Հայաստան» եւ ՀՅԴ կուսակցությունների հայտարարությունը եւ ԲՀԿ-ի հակընդեմ հայտարարությունը, Իվետա Տոնոյանն ասաց, որ այս պահին միասնական օրակարգ ձեւավորելու եւ համատեղ պայքար տանելու չորս կուսակցությունների համաձայնություն կա`հավելելով, որ նպատակահարմար չէ որեւէ մեկին առանձնացնել եւ հատկապես նրա հետ համագործակցությունները շեշտադրել:
Հարցին`ինչպե՞ս են պատկերացնում կառավարության հրաժարականը, Նիկոլ Փաշինյանի հեռանալը, Իվետա Տոնոյանը պատասխանեց, որ դա քաղաքական գործընթաց է եւ ինքը չի պատրաստվում այս պահին հրապարակել գործողությունների ճանապարհային քարտեզը: Ասաց, որ քննարկումները շարունակվում են, այլ քաղաքական ուժեր են միանում իրենց եւ վերջնական ֆորմատի ձեւավորումից հետո ավելի հստակ հայտարարություններով հանդես կգան: Նա նաեւ վերահաստատեց`արտակարգ դրության պայմաններում ցույցեր չեն անելու:
Կարդացեք նաև
Արտակարգ դրությունը երկարաձգելու եւ ԱԺ-ում այդ հարցով քննիչ հանձնաժողով ստեղծելու հարցով ՍԴ դիմելու մասով դեռ որեւէ նորություն չկա. ԼՀԿ-ի հետ բանակցությունները դեռ շարունակվում են:
Նելլի ԳՐԻԳՈՐՅԱՆ
