Եվրոպայում գնալով ավելի շատ են կիրառում առանց ազատությունից զրկելու պատժամիջոցները: Բացի այդ եվրոպական բանտերից կորոնավիրուսի համավարակի հետևանքով ստեղծված իրավիճակի պատճառով ազատ է արձակվել 118 հազար բանտարկյալ: Այս մասին վկայում է Լոզանի համալսարանի SPACE II նոր հետազոտությունը, որն արվել է Եվրոպայի Խորհրդի համար:
Ըստ հետազոտության՝ Հայաստանը դասվել է այն երկրների շարքին, որոնցում 2018թ. համեմատ 2019թ. հունվարի 31-ի դրությամբ աճել է պրոբացիայի ծառայության շահառուների թիվը: 2018թ. հունվարի 31-ի դրությամբ նրանց թիվը կազմել է 5234, իսկ 19թ. հունվարի 31-ի դրությամբ՝ 6242:
Համավարակի պայմաններում Եվրոպայում բանտարկյալների մասին զեկույցն էլ վկայում է, որ Հայաստանը 20 բանտերի վարչակազմերի շարքում է, որոնք կորոնավիրուսի պատճառով ազատ են արձակել բանտարկյալների: Հայաստանում ազատ է արձակվել 36 մարդ (բանտային բնակչության 1,6%):
Հետազոտությունում ներառված 43 բանտային վարչակազմերից 20-ը հայտնել են, որ ազատ են արձակել բանտարկյալներին` կանխելու COVID-19-ի տարածումը, կիրառելով տարբեր միջոցներ, այդ թվում՝ համաներում, վաղաժամկետ և ժամանակավոր ազատ արձակում և ազատությունից զրկելու այլ այլընտրանքների կիրառում: Ըստ տեղեկության՝ ԵԽ անդամ երկրներում ազատ է արձակել բանտերի բնակչության 5%-ը (ավելի քան 118,000 բանտարկյալ):
Կարդացեք նաև
Ավելի վաղ հաղորդել էինք այն մասին, որ Եվրոպայի խորհուրդը հրապարակել է քրեական վիճակագրության մասին ամենամյա զեկույցը (SPACE), որը ներառում է 2018-2019թ. հունվար ընկած ժամանակաշրջանի տվյալները: Զեկույցի համաձայն՝ 2019թ. հունվարի դրությամբ Հայաստանում եղել է 2,266 բանտարկված՝ 2,965,269 բնակչության պարագայում, ինչը նշանակում է, որ երկրում ազատազրկվածների թիվը նվազել է 35.9%-ով՝ 2018-ի համեմատ (3,536): Միևնույն ժամանակ Հայաստանում շարունակել է բարձր մնալ բանտերում մահացության ցուցանիշը:
Պատրաստեց՝ Վիկտորյա ԱՆԴՐԵԱՍՅԱՆԸ
