Բարձրագույն դատական խորհրդի (ԲԴԽ) անդամ Հայկ Հովհաննիսյանը ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննության ընթացքում ինքնաբացարկի միջնորդություն ներկայացրեց:
Բարձրագույն դատական խորհուրդը սկսել է ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը: Կարգապահական վարույթը հարուցվել է արդարադատության նախարար Ռուստամ Բադասյանի կողմից՝ ՀՔԾ պետ Սասուն Խաչատրյանի հաղորդման հիման վրա:
Հայկ Հովհաննիսյանը հայտարարեց, «Որքանո՞վ է բարոյական, ճիշտ, որ ես դատավոր հանդիսանամ մի գործով, որտեղ կան առերևույթ նմանություններ ԲԴԽ-ի հանձնախմբի կողմից ինձ մեղսագրվող խախտումների և բուն գործով Ազարյանին առաջադրվող ենթադրյալ խախտումների միջև»:
Ինքնաբացարկի հաջորդ պատճառն անձնական էր: Հայկ Հովհաննիսյանն ասաց. «Ես պարտավոր եմ ԲԴԽ-ին և կողմերին բացահայտել, որ ՀՔԾ պետն իմ համակուրսեցին է, որի հետ գտնվում ենք ընկերական հարաբերությունների մեջ՝ 1993-ից առ այսօր»:
Կարդացեք նաև
ՀՀ Բարձրագույն դատական խորհուրդը սկսելու է ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը։
Ալեքսանդր Ազարյանի պաշտպան Տիգրան Աթանեսյանը հայտարարեց, որ միջնորդելու են որպես վկա հրավիրել ՀՔԾ պետ Սասուն Խաչատրյանին ու նկատեց. «Իմ կարծիքով՝ հաճելի չէ սեփական ընկերոջը հարցաքննելը: Եվ այս դեպքում խորհրդի անդամի կարգավիճակում գտնվելը երևի թե ճիշտ չէ»:
Խորհրդակցական սենյակից վերադառնալով՝ ԲԴԽ-ն Հայկ Հովհաննիսյանի ինքնաբացարկի միջնորդությունը մերժելու մասին որոշում հրապարակեց:
Տաթև ՀԱՐՈՒԹՅՈՒՆՅԱՆ
