ԱԺ-ն այսօրվա նիստում քննարկում է «ԵՏՄ անդամ պետությունների աշխատողների կենսաթոշակային ապահովության մասին» համաձայնագիրը վավերացնելու հարցը: 2019թ.-ին ստորագրված այս համաձայնագրով աշխատուժի տեղաշարժի խոչընդոտները բացառելու նպատակով սահմանվում է՝ ԵՏՄ անդամ երկրի ամեն քաղաքացի հնարավորություն կունենա անարգել ստանալ կենսաթոշակ՝ անկախ այն հանգամանքից, թե ԵՏՄ անդամ որ երկրի տարածքում է վաստակել կենսաթոշակի իրավունք եւ թե որ երկրում է այդ պահին բնակվում:
Ինչպես զեկուցեց ՀՀ աշխատանքի եւ սոցիալական հարցերի փոխնախարար Սմբատ Սաիյանը՝ համաձայնագիրը տարածվելու է բոլոր տեսակի կենսաթոշակների վրա: Փոխնախարարի խոսքով՝ եթե անձը, օրինակ, ԵՏՄ երեք երկրներում աշխատանքային փորձ է ունեցել եւ թոշակ է ստանում, գտնվելով, օրինակ, Ռուսաստանում, կարող է ստանալ ՀՀ-ի, Բելառուսի եւ Ղազախստանի օրենսդրությամբ սահմանված կենսաթոշակը: Համաձայնագիրը տարածվելու է ուժի մեջ մտնելուց, այսինքն՝ ԵՏՄ բոլոր երկրների կողմից վավերացվելուց հետո ձեռք բերած կենսաթոշակային իրավունքի վրա:
Լուիզա ՍՈՒՔԻԱՍՅԱՆ
