«Օտարերկրյա հեռուստաընկերությունների հեռարձակման վերաբերյալ այստեղ հնչել են հարցեր, որոնցից տպավորություն է, թե մեր որոշ գործընկերներ փորձում են մանիպուլյացիայի ենթարկել Հայաստանին եւ գործընկեր պետություններին վերաբերող հարցերը՝ քաղաքականացնելով դրանք»,-ԱԺ նիստում այսօր խոսելով «Իմ քայլի» պատգամավորներ Մխիթար Հայրապետյանի եւ Վահագն Թեւոսյանի, անկուսակցական պատգամավոր Արման Բաբաջանյանի հեղինակած եւ առաջին ընթերցմամբ քննարկվող՝ «Տեսալսողական մեդիայի մասին» մայր օրենքի դրույթներից՝ ասաց ՀՀ բարձր տեխնոլոգիական արդյունաբերության նախարար Հակոբ Արշակյանը:
«Տեղեկացնեմ, որ այս օրենքը կոնկրետ պատասխաններ ունի օտարերկրյա հեռուստաընկերությունների հեռարձակման առնչությամբ: Մեր ռուս գործընկերների հետ արդյունավետ քննարկումներ ենք ունեցել, եւ հարցն առհասարակ քաղաքական ենթատեքստ չունի: Այն կրում է զուտ տեխնիկական, միջպետական բնույթ: Օրենքը սահմանում է, որ ՀՀ-ում վերահեռարձակվել պատրաստվող ցանկացած այլ երկրի հեռուստաընկերություն պետք է ունենա միջպետական համաձայնագիր, որում պետք է ամրագրվեն նաեւ ՀՀ-ի շահերը»,-նշեց նախարարը:
Ապա շարունակեց. «Մասնավորապես, որեւէ պետության հեռուստաընկերության վերահեռարձակումը միջպետական համաձայնագրի շրջանակում ենթադրելու է նաեւ հայկական հեռուստաալիքի վերահեռարձակում՝ այդ պետության տարածքում: Այս տեխնիկական մասը կարգավորված է այս օրենքով, եւ ավելորդ շահարկումների չպետք է տրվել»:
Կարդացեք նաև
Լուիզա ՍՈՒՔԻԱՍՅԱՆ
