«Կարգավորման դաշտ են բերվելու ոլորտի բոլոր կառույցները՝ բացառությամբ առցանց հեռարձակման հեռուստաալիքների»,-ԱԺ նիստում այսօր ասաց առաջին ընթերցմամբ քննարկվող «Տեսալսողական մեդիայի մասին» մայր օրենքի համահեղինակներից «Իմ քայլի» պատգամավոր Վահագն Թեւոսյանը: Նրա խոսքով՝ օրինագիծը ենթադրում է նաեւ ոլորտում մենաշնորհների վերացում, եթերի հայաֆիկացում՝ առանց տնտեսվարողների համար առանցքային ջանքերի:
«Անհասկանալի հեռուստաալիքների փոխարեն ունենալու ենք քիչ, բայց լավ ալիքներ: Գուցե եւ թիվը չպակասի: Պետք է փորձենք նաեւ մի մոդել ներմուծել այս օրենք, որպեսզի խոսքի ազատությունն անգամ մազաչափ վտանգված չլինի, բայց հանրային մուլտիպլեքսում խոսքի ամենաթողությունը հնարավոր լինի սանձել: Չի կարելի հանրային մուլտիպլեքսում որեւէ ալիքով հնչեցնել, թե կորոնավիրուսը սուտ է, դիմակ մի կրեք եւ այլն…ուղղակի չի կարելի նման բաներ»,-համոզմունք հայտնեց պատգամավորը:
«Իմ քայլի» պատգամավոր Լիլիթ Ստեփանյանը հետաքրքրվեց՝ ինչպե՞ս է կարգավորվելու ժարգոնով համեմված սերիալների ցուցադրման հարցը: Թեւոսյանն արձագանքեց, որ պետք է առաջնորդվել խելամտության կանխավարկածով. «Քաղաքացիներին կոչ կանեմ ալիքը փոխել, ավելի հետաքրքիր ալիք նայել: Որքան քիչ վարկանիշ ունենան այդ սերիալները, այնքան տնտեսվարողը չի ուզենա դրանք նկարահանել: Նկարահանվում են այնքան ժամանակ, որքան որ նայում են: Խնդրում եմ՝ մի նայեք»:
Լուիզա ՍՈՒՔԻԱՍՅԱՆ
