«Վերջերս մի փոքր հաճախ եմ այցելում ոստիկանության բաժիններ»,- «Պոլիտէկոնոմիա» հետազոտական ինստիտուտի նախաձեռնած «Կորոնավիրուսային ճգնաժամը, դրա հումանիտար և սոցիալ–տնտեսական հետևանքները․ գնահատականներ և լուծումներ» խորագրով քննարկմանն ասաց իրավապաշտպան Ռուբեն Մելիքյանը:
Հիշեցնենք՝ նրան վարչական ձերբակալության էին ենթարկել այն ժամանակ, երբ ինքը փորձել է ոստիկաններին տեղեկացնել, որ Ազգային ժողովի պատգամավորների ձերբակալություններն իրավաչափ չեն:
Նա նշեց, որ սա համակարգային երևույթ է կրում. իրենից բացի ևս երկու դեպք է գրանցվել: Խոսելով իշխանությունների վարած քաղաքականության մասին՝ ասաց. «Որքան էլ նրանք պնդեն, որ իշխանությունը պատկանում է ժողովրդին, իշխանությունն իրականացնում են կոնկրետ մարդիկ և նրանք են պատասխանատվություն կրում բոլորիս իրավունքների՝ առաջին հերթին կյանքի իրավունքի, առողջության պահպանման իրավունքի համար»:
Խաղաղ հավաքների ազատության մասին խոսելով՝ ասաց, որ գտել էր 2015-ի ձայնագրություն, որտեղ մի մարդ, որը շատ հիշեցնում է Նիկոլ Փաշինյանին և ինքը ենթադրում է, որ նա Նիկոլ Փաշինյանն է, հայտարարում է հավաքների ազատության մասին օրենքն իր ձեռքին՝ 32-րդ հոդվածը մեջբերելով. «Կարծեմ Էլեկտրիկ Երևանի ժամանակ էր, որ հայտարարում էր՝ եթե հավաքը կրում է խաղաղ բնույթ, ապա ոստիկանությունը պարտավոր է ապահովել հավաքի անվտանգությունը: Եվ շատ ճիշտ է ասում Նիկոլ Փաշինյանը: Շնորհակալ ենք, որ հեռավոր 2015-ին մեր այսօրվա մոտեցումն էր պաշտպանում: Ես այս երեսպաշտության վրա զարմացած եմ. նույն մարդիկ էին»:
Կարդացեք նաև
Ռուբեն Մելիքյանը պնդեց՝ վերջին օրերի հավաքները խաղաղ էին, մարդիկ ֆանտաստիկ կարգապահություն էին պահպանում, հետևաբար, եթե հավաքը խաղաղ է, ոստիկանությունը պարտավոր է ապահովել հավաքի անվտանգությունը:
Խոսելով ՀՀ պարետի որոշումների մասին՝ իրավապաշտպանն ասաց. «ՀՀ Սահմանադրությունը սահմանում է, որ նորմատիվ իրավական ակտեր կարող են կայացնել սահմանադրությամբ նախատեսված մարմինները: Եթե որևէ մեկը Սահմանադրության մեջ գտնի պարետ բառը, ներողություն կխնդրեմ և խոսքերս հետ կվերցնեմ: Առհասարակ ի՞նչ իրավունք ունի պարետը կանոններ սահմանել: Սկզբում կար հանդուրժողականության սպասում, հետո առաջացավ դժգոհություն և ցասում: Բայց այդ հարցը հիմա բարձրացնում ենք. ո՞վ է պարետը Սահմանադրությամբ, որ մի հատ էլ կանոններ սահմանի: Եվ այդ հարցը բարձրացվելու է իրավական ճանապարհով: Փորձել են մայիսին ինչ-որ ձևակերպումներ տալ. ի պաշտոնե է գործում վարչապետ և փոխվարչապետ, ուրեմն թող լինի վարչապետի և փոխվարչապետի որոշում: Այնքան ցածր գրագիտություն ունեին, որ ցանկացած նորմատիվ ակտի կողքին կարող էին գիծ դնել ու գրել «ա» կամ «ն»՝ անհատական կամ նորմատիվային: Բայց միայն վերջին օրերին են սկսել անել»:
Տաթև ՀԱՐՈՒԹՅՈՒՆՅԱՆ
