Հայ հեղափոխական դաշնակցության Գերագույն մարմնի անդամ Արծվիկ Մինասյանի տպավորությամբ՝ երբ քննադատում, կարծիք ես հնչեցնում, իշխանության վարքագիծը միանգամից ոչ միայն մերժողական է դառնում, այլև պիտակավորում են: Ըստ նրա՝ դրա փոխարեն իշխանությունը պետք է քննարկի հնչեցրած այլընտրանքային կարծիքը, առաջարկությունը և լուծումներ փորձի առաջարկել:
Նրա համար անընդունելի է այն երևույթը, երբ քննադատողներին իշխանության ներկայացուցիչները պիտակավորում են, հետո փորձում գտնել մեղավորներ: «Պոլիտէկոնոմիա» հետազոտական ինստիտուտի նախաձեռնած «Կորոնավիրուսային ճգնաժամը, դրա հումանիտար և սոցիալ–տնտեսական հետևանքները․ գնահատականներ և լուծումներ» խորագրով քննարկմանն այս առիթով Արծվիկ Մինասյանն ասաց. «Մեղավորները դառնում նախկինները, կամ ժողովուրդն է մեղավոր դառնում, կամ տնտեսվարող սուբյեկտները կամ այն անձինք, ում տվել են օժանդակություն, հետո հետ վերցրել: Մինչդեռ հիմքերի հիմքն այն ծրագրերը, պատկերացումներն ու մոտեցումներն են, որոնք որպես սոցիալ-տնտեսական հակազդման միջոցառում պիտի իրականացվեին: Իսկ այդ միջոցառումները, որոնք մշակվել են և քարոզվել, ոչ միայն համարժեք չէին ստեղծված իրավիճակին, այլ ավելի են վատացնում իրավիճակը: Բացառությամբ մեկ-երկու ծրագրի, որոնք նպատակային և թիրախային գնացել են կոնկրետ սոցիալական խմբի, անձի աջակցության, մնացած բոլոր ծրագրերն անարդյունավետ են, և հանրային միջոցների փոշիացում էր»:
Ըստ Արծվիկ Մինասյանի՝ հիմա հայտնվել ենք մի իրավիճակում, երբ ինչքան էլ արդեն ծախսես, արդյունավետություն չի ապահովելու:
Ըստ նրա՝ արտակարգ դրության երկարացումն անարդյունավետ էր, և դրա համար պետք է պատասխանատվության կանչվեն կոնկրետ մարդիկ, որ դա հետագայում պատճառ դառնա ավելի ճիշտ քաղաքականություն վարելու. «Մենք տեսնում ենք հասարակության ուշադրության անընդհատ շեղման գործողություններ, արտակարգ դրության երկարացում առանց կոնկրետ սոցիալ- տնտեսական, համավարակի դեմ պայքարի, բայց փոխարենը տեսնում ենք քաղաքական իրավունքների մասսայական ոտնահարում, քաղաքական բոլոր հնարավոր զարգացումների ոտնահարում, քաղաքական դաշտի ոչնչացում»:
Կարդացեք նաև
Ամփոփելով Արծվիկ Մինասյանն ասաց. «Եթե այս իշխանություններն այլևս ի վիճակի չեն հասկանալու, ընկալելու, ըմբռնելու, օր առաջ պետք է փոխվել նրանց, տուն ուղարկել, ձևավորել մի նոր, այնպիսի իշխանություն, որն ունակ է այս ամեն ինչը հասկանալ, ընկալել»:
Տաթև ՀԱՐՈՒԹՅՈՒՆՅԱՆ
