«Մասնավոր զրույցներում եւ սոցցանցերում խոսվում է, որ հանձնաժողովի կազմը հին է: Փորձեմ վերջակետ դնեմ: Այո, ՀՌՀ-ի ողջ կազմը ձեւավորված է մինչեւ 2018թ.-ը, եւ դրանում շատ մարդիկ կան՝ տարբեր ճանապարհ անցած, տարբեր քաղաքական հայացքներով»,-հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում ասաց ՀՌՀ նախագահ Տիգրան Հակոբյանը:
«Կա երկու անդամ՝ մասնակցած արցախյան ազատամարտին: Կա նախկին նախարար, կա անձ, որը եղել է ԱԺ աշխատակազմի ղեկավար, մյուսն էլ ղեկավարել է մանկական ալիք: Մենք բոլորս կարողանում ենք ապահովել օրենսդրական նորմերը եւ ներդաշնակ կարգավորել հեռուստաընկերությունների աշխատանքը: Ես վստահում եմ բոլորին, թեեւ մենք տարաձայնություններ ունենք: Երբեմն ինձանից շատ ջանքեր են պահանջվում, որպեսզի ես ինչ-որ բանում համոզեմ»,-նշեց նա:
Տիգրան Հակոբյանը շեշտեց. «Մենք վիճում ենք, բայց, վստահեցնում եմ, հանձնաժողովի անդամները հայրենասեր մարդիկ են, սիրում են իրենց գործը: Բոլորին խնդրում եմ այս կամ այն կուսակցական պատկանելությամբ հանձնաժողովի անդամներին չպիտակավորել այլեւս: Նրանք ազնիվ մարդիկ են եւ իրենց կարողությունների չափով կայացնում են ոլորտը: Այստեղ հնչեց Կորյուն Առաքելյանի մասին կարծիք: Նա մեր ավագ գործընկերն է, շատ լավ մշակութաբան: Իմիջիայլոց, նա 2003թ.-ին Բաղրամյան պողոտայում դուբինկայով ծեծ է կերել: Ոչ բոլորն են այստեղ այդ ծեծը կերել»:
Լուիզա ՍՈՒՔԻԱՍՅԱՆ
Կարդացեք նաև
Լուսանկարը՝ ՀՌՀ ֆեյսբուքյան էջից
