«Խաղաղ հավաքների իրավունքն արգելափակելով՝ սկսվեցին քաղաքական ռեպրեսիաներ: Դուրս է գալիս, որ մենք կարող ենք մարդու դեմ քրեական գործ հարուցել, ձերբակալել, կալանավորել, բայց դուք բողոքելու իրավունք չունեք: Վարակ է տարածվում»,- «Պոլիտէկոնոմիա» հետազոտական ինստիտուտի նախաձեռնած «Կորոնավիրուսային ճգնաժամը, դրա հումանիտար և սոցիալ–տնտեսական հետևանքները․ գնահատականներ և լուծումներ» խորագրով քննարկմանն այսպիսի մտահոգություն հայտնեց Հայաստանի Հելսինկյան կոմիտեի նախագահ Ավետիք Իշխանյանը:
Նա խնդրահարույց համարեց այն, որ առնվազն երեք հոգի բերման են ենթարկվել միայնակ բողոքելիս, ինչը հավաք չէ:
Ավետիք Իշխանյանը նշեց, որ թեև շատ սահմանափակումներ մեղմացվել են, սակայն խաղաղ հավաքների արգելքը դեռ չի հանվել: Բայց մյուս կողմից վստահեցրեց, որ խաղաղ հավաքների իրավունքը համարվում է իրավունքների թագուհիներից մեկը, քանի որ այն ներառում է և′ խոսքի ազատությունը, և′ բողոքի իրավունքը, և′ միավորումների իրավունքը:
Նաև ասաց, թե նույնիսկ ամենաժողովրդավարական երկրներում տարբեր խմբեր են լինում՝ կրոնական, քաղաքական և այլն, որոնք հնարավորություն չունեն խորհրդարանում ներկայացվածության, իսկ խաղաղ հավաքների ազատության իրավունքը նաև դրանով է կարևոր, որ մարդիկ կարողանան իրենց ձայնը տեղ հասցնել:
Կարդացեք նաև
Խոսելով Հայաստանում խաղաղ հավաքների արգելման և ոստիկանական ուժերի գործողությունների մասին՝ Ավետիք Իշխանյանը նկատեց. «Ոստիկանական ուժերով ավելի են սաստկացնում համավարակի տարածումը: Եթե նրանք չխառնվեն, մարդիկ իրարից հեռավորության վրա կանգնած կանեն իրենց հավաքը, կարտահայտեն իրենց բողոքը և կգնան: Իսկ ոստիկանությունը հրահրում է»:
Ավետիք Իշխանյանը հղում կատարեց ՄԱԿ-ի խաղաղ հավաքների և միավորումների զեկուցող հանձնակատար Կլեման Վուլի զեկույցին, որը խորհրդատվական բնույթ է կրում ՄԱԿ-ի անդամ պետությունների համար: Այնուհետև պարզաբանեց. «Այստեղ նշվում է, որ շատ երկրներում այդ հավաքների արգելքից, այդ սահմանափակումներից իշխանությունները օգտվում են ընդդիմությանը ճնշելու համար. միանձնյա կառավարում է գնում: Զեկուցողը նաև նշում է մի քանի սկզբունքներ, որոնք պետք է չսահմանափակվեն. օրինակ՝ մարդու իրավունքների սահմանափակումները, ցանկացած որոշում, սահմանափակում չպետք է լինի մահակ ընդդիմության դեմ օգտագործելու համար: Խաղաղ հավաքների իրավունքը չպետք է սահմանափակվի, քանի որ մարդիկ իրավունք ունեն բողոքելու և այլն: Ավելին, զեկույցում ամրագրված է, որ այս ընթացքում պետք է պահպանել հակակշիռներն օրենսդիր և դատական իշխանությունների, քանի որ չափից դուրս կենտրոնացումը մեկ իշխանության ձեռքին, բոլորովին չի բխում սահմանափակումների տեսանկյունից»:
Տաթև ՀԱՐՈՒԹՅՈՒՆՅԱՆ
