«Կասկածներ կան, որ որոշ հեռուստաընկերություններ ցուցադրում են չլիցենզավորված ֆիլմեր՝ դրանով ստեղծելով անհավասար մրցակցային պայմաններ»,-հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում նման խնդիր բարձրաձայնեց «Իմ քայլի» պատգամավոր Հրաչ Հակոբյանը:
ՀՌՀ նախագահ Տիգրան Հակոբյանը նախ նշեց, որ հանձնաժողովի աշխատանքի ամենադրական կողմերից մեկը հեղինակային իրավունքի պահպանմանն ուղղված քայլերն են, որոնք հաջողությամբ են իրականացվում. «Հանրապետական եւ մայրաքաղաքային ծածկույթ ունեցող հեռուստաընկերությունները գրեթե 100% -ով ապահովում են օրենքի պահանջը: Այստեղ այլ խնդիր կա: Ամեն ամիս մենք պահանջում ենք հեղինակային իրավունքի պահանջ ունեցող արտադրանքի ցանկը եւ ստուգում, բայց լիազորություն չունենք ստուգելու հեռուստաընկերության եւ ինչ-որ օֆշորային կազմակերպության պայմանագիրը»:
Հակոբյանի խոսքով. «Այստեղ շատ ժամանակ չարաշահումներն են թաքնված լինում: Դրանք ի հայտ են գալիս միայն այն ժամանակ, երբ իրական սեփականատերը դիմում է մեզ բողոքով, որ տվյալ օֆշորային ընկերությունը որեւէ իրավունք չուներ այդ արտադրանքը վաճառելու: Իսկ ներքին թղթաբանությամբ այդ խնդիրը լուծված է նաեւ կաբելային ցանցերում: Նախորդ տարի մոտ տասը հեռուստաընկերություն տուգանվել է հեղինակային իրավունքի խախտման համար, ինչն անցած տարիներին տեղի չէր ունենում»:
Լուիզա ՍՈՒՔԻԱՍՅԱՆ
