«Կան հեռուստաալիքներ, որոնք պատկանում են նախկին պաշտոնյաներին, միլիարդատերերին, եւ այդ ալիքներով միշտ խոսում է նրանց քաղաքական ակտիվը: Ընդդիմադիր ուժերը, որոնք քննադատում են իշխանությանը, այդ ալիքներում չեն հայտնվում: Ընդդիմությունը կայացած չէ, որովհետեւ մեդիադաշտն օկուպացված է նախկին իշխանության մի խումբ ներկայացուցիչների կողմից, որոնք իրենց հռչակել են ընդդիմություն»,-հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում ասաց «Իմ քայլի» պատգամավոր Միքայել Զոլյանը:
Նա շարունակեց. «Եթե պայմանական ասենք, Արմեն Աշոտյանի նման կերպարներն ամբողջ ժամանակ հեռուստատեսությամբ ելույթ են ունենում, իսկ ընդդիմադիր կուսակցությունը, անկախ փորձագետն ու լրագրողները չեն հայտնվում այդ եթերում: Այս իրավիճակի հետ հնարավո՞ր է մի բան անել»:
ՀՌՀ նախագահ Տիգրան Հակոբյանը նշեց. «Քաղաքական անկողմնակալության նորմը պարտադիր է բոլոր հեռարձակողների համար: Բոլոր հեռուստաընկերությունները պետք է ապահովեն քաղաքական ուժերի, տարբեր կարծիքների ներկայությունը, խոսքի իրավունքը: Հուսամ՝ այս բոլոր նորմերը տեղ կգտնեն շրջանառության մեջ դրված օրենքի նախագծում»:
Միքայել Զոլյանը նաեւ համոզմունք հայտնեց՝ կարեւոր է, որ, օրինակ, կորոնավիրուսի համաճարակի հետ կապված հարցերը մեկնաբանեն անկախ փորձագետները, որոնք ոլորտի մասնագետներ են. «Դա դժվար է ապահովել, որովհետեւ հաճախ ենք տեսնում, որ, օրինակ, ատամնաբույժը խոսում է համավարակի մասին: Կամ, որեւէ մեկը ներկայանում է քաղաքագետ, բայց որեւէ հոդված չի գրել: Հնարավո՞ր է փորձագետ ներկայացողների կարծիքը մանիպուլյացիաներից զերծ պահել»:
Կարդացեք նաև
Տիգրան Հակոբյանը պատասխանեց, որ հարցն իրենց լիազորություններից դուրս է, եւ դժվար է պատկերացնել, թե ինչպես է հնարավոր խնդիրը կարգավորել:
Լուիզա ՍՈՒՔԻԱՍՅԱՆ
