Հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում «Լուսավոր Հայաստանի» պատգամավոր Անի Սամսոնյանը նկատեց, որ զեկույցում ասված է՝ Հանրային հեռուստաընկերությունը հիմնականում ապահովել է քաղաքական, տնտեսական, սոցիալական խնդիրների վերաբերյալ տեսակետների ներկայացումը լրատվական թողարկումներում եւ հարցազրույցներում: «Քաղաքական հարցազրույցի ժանրի հաղորդումներից մեկում իշխանության ներկայացուցիչները հյուրընկալվել են մոտ 42 անգամ, իսկ ընդդիմությունը՝ 4-5: Դուք կարծում եք, որ այս հարաբերակցությունն ապահովո՞ւմ է քաղաքական կարծիքի բազմազանությունը»,-հարցրեց Սամսոնյանը ՀՌՀ նախագահ Տիգրան Հակոբյանին:
«Լուրերում եղել են ռեպորտաժներ, որոնցում հակադիր կարծիք չի ներկայացվել, պարզաբանելու հնարավորություն չի տրվել, իսկ հասարակական-քաղաքական քննարկումներում կողմերի հավասարակշռությունը չի պահպանվել»,-հավելեց պատգամավորը:
Տիգրան Հակոբյանը նախ նկատեց, որ իր զեկույցը վերաբերում է նախորդ տարվան. «Չեմ բացառում, որ այս տարի վիճակն ավելի բարվոք է եղել, եթե դուք գտնում եք, որ շեղում կա: Բացի այդ, մենք չենք խոսում ընդդիմության եւ իշխանության ներկայացուցիչների հավասարության մասին, եւ որեւէ երկրում նման օրենսդրական պահանջ չկա: Մենք խոսում ենք կարծիքի բազմազանության մասին: Վստահեցնում եմ, անգամ ձեր խմբակցությունում երկու տարբեր անձինք տարբեր կարծիքներ կարող են ունենալ երեխաների սեռական դաստիարակության մասին: Խնդիրը ոչ թե տարբեր ուժերի ներկայացումն է, այլ բազմակարծությունը, որի մասին մենք նշել ենք: Ըստ օրենքի՝ հանձնաժողովը հետեւում է բազմազանությանը եւ իրավասու չէ ներքաշվել խմբագրական քաղաքականության մեջ: Վստահեցնում եմ, որ ըստ մեր ուսումնասիրությունների՝ նախորդ տարում Հանրայինը հիմնականում կարողացել է ապահովել տարբեր տեսակետների ներկայացումը»:
Լուիզա ՍՈՒՔԻԱՍՅԱՆ
