«Գլխավոր դատախազն ասաց, որ քրեական գործ կարող է հարուցվել ցանկացած քաղաքական ուժի հանդեպ: Դուք ակնարկում եք ՀՀԿ-ին, վաղը մյուս օրը նման բանը կարող է վերաբերվել նաեւ այլ ուժի: Եթե «Իմ քայլին» էլ նման դեպք վերաբերի, էլի կլինի քննություն»,-լրագրողների հետ զրույցում այսօր անդրադառնալով Գագիկ Ծառուկյանին առնչվող քրեական գործերին՝ ասաց ԱԺ նախագահ Արարատ Միրզոյանը:
«Վերմիշյանի գործով այլ անձի մոտ գտել են թղթեր, որոնք վերաբերել են պարոն Ծառուկյանին: Հիմա եթե Վերմիշյանի մոտ իմ վերաբերյալ թղթեր գտնվեին, կգային իմ հետեւից»,-համոզմունք հայտնեց Միրզոյանը՝ հիշեցնելով, որ Ծառուկյանին առնչվող քրեական գործերի ապացույցները գտնվել են քաղաքաշինության կոմիտեի ղեկավար Վահագն Վերմիշյանին վերաբերող քրեական գործի խուզարկության ժամանակ:
Ինչպես հայտնել էինք, ԱԺ-ն այսօր գաղտնի քվեարկությամբ 87 «կողմ» ձայներով համաձայնություն տվեց ԲՀԿ առաջնորդ Գագիկ Ծառուկյանի հանդեպ քրեական հետապնդում հարուցելու մասին ՀՀ գլխավոր դատախազ Արթուր Դավթյանի միջնորդագիրը, եւ այժմ քննարկվում է նաեւ Ծառուկյանին ազատությունից զրկելուն համաձայնություն տալու վերաբերյալ ՀՀ գլխավոր դատախազ Արթուր Դավթյանի միջնորդագիրը:
Լրագրողները հետաքրքրվեցին՝ 2015թ.-ին ՀՀԿ-ի եւ ԲՀԿ-ի միջեւ տեղի ունեցած իրադարձությունների եւ Ծառուկյանի հանդեպ հիմա կատարվողի միջեւ նմանություն կա՞: «Բացարձակ նմանություն չկա: Այն ժամանակ եղել է շանտաժ, որ՝ պարոն Ծառուկյան, եթե մեզ հաճելի քաղաքական վարքագիծ չդրսեւորես, մենք կդիմենք մեր ունեցած կոմպրոմատներին…նման վարքագիծը մեր համար ընդունելի չէ»,-պատասխանեց Արարատ Միրզոյանը:
Կարդացեք նաև
Լուիզա ՍՈՒՔԻԱՍՅԱՆ
